买楼DNA

　　香港迪士尼乐园位於大屿山欣澳，好似好远，其实从好多地区去欣澳，只不过30分钟车程，顶多系45分钟就可揸车到酒店门口，比去外地快好多。但酒店房间几贵噃，房租一定高过曼谷与台北四星酒店。泰国R几日前吃午饭时先至讲及：「喂，你应该多啲去吓曼谷啦，酒店好平㗎咋，好抵玩。」同大记者讲起去迪士尼嘅餐费（一家八大三小共吃了早午晚三餐共七千五百元），即刻话：「去台北度周末可能仲便宜一啲。」此则见仁见智，照左丁山睇，台北冇一间酒店有迪士尼咁清静，咁好环境噃，而且幼童去台北其实冇乜地方好行，家庭乐谈不上，年轻夫妇去台北逛书局叹小笼包就好正。

　　沙田陈太嘅一位亲戚I就与家姐同去伦敦，两姊妹到伦敦翌日，就发生伦敦桥恐袭，虽然无事，却吓咗一跳。亲戚I回报：「好彩我同家姐一心去睇楼，约咗一个经纪去住宅区，冇去到伦敦桥影相啫。」香港人现时去伦敦，一个流行节目就系睇楼，当香港纳米楼要卖万几蚊一尺之时，伦敦楼就变得好吸引。亲戚I由Notting Hill睇到Chelsea，Bloomsbury，发觉豪宅太贵，系强国亿万富豪先至可以有得谂，但香港中高产人士亦有大把选择，一啲距离帝国学院十个地铁站嘅排屋只售一百万英镑多啲，搞到亲戚I家姐心郁郁，乜唔系啫，北角丹拿山一个旧楼单位都要一千万港元，不如换楼好过。

　　去伦敦买楼唔好讲到移民咁严重，其他理由有好多嘅，最常见最容易嘅理由就系子女去伦敦读书，要搵地方住，而伦敦房租贵，不如自己买番一个单位俾子女住，悭租兼希望保值，升值。老友印刷L十几年前就系咁样做，先知先觉，赚到笑。亲戚I家姐就因为两个仔女在英国读完医科，不能返香港做医生，留在英国加入NHS系统行医，其中一位娶咗一个物理治疗师，但因为伦敦租金贵，医生薪水低，住唔起伦敦，要搬往一小时火车车程以外嘅小城，等於叫一对香港医生护士夫妇搬咗去东莞住，日日坐火车到九龙伊利沙伯医院返工。有说香港年青人因楼价贵，睇唔到前景喎，英国年青医生何尝可以住在伦敦市内？买楼买地，深入香港人之DNA，最近知道一位大学毕业生与同学到峇里岛作毕业旅行，竟然将两年兼职工作积蓄，买咗一幅地，理由系十万元在香港乜都买唔到，在印尼可以买到屋地，一於博一博！左丁山佩服佢勇气可嘉之余，亦感觉到对香港人来讲，人生最大目标就是一层楼，多谢梁振英啦，佢任内香港楼价创历史新高呀。