买楼好似食大闸蟹，等大造才买

　　友人在几个月前请食大闸蟹，有个好听的名字，叫「六月黄」。其实是BB蟹，不但只得小小黄，蟹身亦非常削，於是我话胆固醇太高，一年只可以食两三次大闸蟹，等大造才食，唔好浪费Quota。较早前老友话九圆十尖，九圆啱造。我又话唔食，圆即是乸，蟹羔好似咸蛋黄一样，唔觉得好食，都系唔好浪费Quota。到最近，公蟹大造，我请食大闸蟹。老友话心领，因为这两三个月食得太多六月黄及蟹乸，胆固醇太高，医生唔准再食。明年请早，真浪费。

　　有很多香港人都好似我老友一样，明知自己胆固醇过高，不能多食大闸蟹，最好办法就是等到季尾，公蟹大造，又平又靓的时候才食。但他们大多数都受不了诱惑，食完六月黄食蟹乸，又贵又唔系咁好食。到公蟹大造，又平又靓，他们又唔能够食。其实，买楼的人有同样心态，今年初，无论买新楼或者二手楼，都冇乜选择。买新楼入左飞之后仲要抽签，抽得到都未必好，买二手楼仲惨，有钱都只能够买到二楼后座的单位，惨过食六月黄。

　　近两个月就比较好，新楼因为认购率不足，有钱可以慢慢拣慢慢买，最紧要是不用抽签。啱就买，唔啱可以唔买。如果有心买二手楼的话，随时可以买到一些平靓正单位，不过一定要花些少时间去搵，感觉上都好似食蟹乸一样，久不久都有一只唔错，不过是可遇不可求。隔多几个月，大约在春节之后，形势就会完全不同，将会有多个新楼盘推出市场，楼价不但比现在平，而且会有更多选择，更多优惠。去到新楼售楼部所得到的待遇，就会感觉到这才是买楼。

　　至於买二手楼，买楼的人会感觉到自己是白武士，救万民於水火之中，任何不合理的还价都有可能被接受，卖家还会千多万谢。理由很简单，因为太多放盘，大家都知道物以罕为贵。点解要在缺盘的时候去买楼？不如等大造才买，就算买唔到都开心。