加密货币嘅泡沫升幅,令其他泡沫例如股票同地产完全唔入流。泡沫其实都有好多层次,例如啤酒泡沫,泡沫消散后,仲有杯啤酒过你饮。但如果系梳乎厘嘅泡沫,入口有如空气,咁就正如股票前辈所讲,买资产买着空气,迟早渣都冇。
加密货币嘅泡沫,就系可以渣都冇。只不过,佢哋嘅泡沫仍未成形,仲有好大改变空间。Bitcoin面世差唔多10年,系今年你先听过仲参与买过,3年前Bitcoin仲系小众玩意,今日已经讨论佢会否代替黄金。
下年泡沫会变成怎样,冇人预到。一朝梳乎厘由虚变实成为蛋糕,到时就冇人话系庞氏骗局。都系嗰句,你成世人都活在泡沫年代,如果一听泡沫你就行开,你而家应该几穷。
香港房地产都话系泡沫,但系教授买泡沫,地产大炒家又买泡沫,眼都唔眨,点解释?睇淡楼市,唔系应该全部沽晒现货,等跌市捞底?从来睇淡嘅人做嘅嘢同佢讲嘅嘢相反,辩称为市场一面睇好,自己咁有份量,惟有睇淡,将预测变做赌波开盘,个个买曼城,惟有落注曼联,平衡啲。市民唔系赌大细,系想听真实情况。人人讲升,你惟有讲跌,博人哋错你啱攞掌声,大开眼界,害了市民。
香港楼市同比特币一样,易升难跌, 因为想沽嘅人唔多。买咗楼唔敢沽嘅人大把,6千万沽咗层楼,你觉得佢好有钱,但佢想买番嚟住嘅楼要一亿,佢就觉得自己好穷,唔敢沽楼。比特币一样,好多几千蚊沽咗比特币嘅,而家揼到大髀内侧瘀晒,恨错难返。手上仲有货嘅,打死唔会沽。以前叫人买股票,买完要放落床下底唔理佢,好多人都做唔到。但系比特币买咗唔理佢,好多人做到,大家都要等到泡沫爆破一刻,先至心甘命抵。沽压唔重嘅比特币,睇升赢面大过睇跌。除非你有货,否则唔好立乱沽空期货,输死你。
今年搵到餐晏仔食。2018年,唔使讲,资产组合要有加密货币,否则你好难跑赢2017。