香港对业主最友善

　　公屋是否封顶80万间？以后政府目标就系帮人买楼？唔理系绿置居，白居二，还是首置上车盘，政府就系想香港人买楼，这是否政府学新加坡嘅香港版？对於政府嚟讲，愈多市民系业主，社会愈稳定，因为供紧楼嘅人系最逆来顺受，人生最惊就系冇咗份工。营营役役嘅人，最唔会搞搞震。有冇睇《逆权司机》同《逆权大状》？本来为钱生活嘅人，最后钱都唔要，一心求公义，豁出去，系天不怕地不怕。而家嘅年代，好少人穷到冇饭开，一般人唔会怕冇钱开饭。唯一会惊嘅，就系买咗层楼，一身债，咁就会惊冇钱。人人做业主，最好就系年轻人个个打工供楼，咁就好似每个人都植入咗个微型炸弹，想唔乖乖地听话都唔得。

　　虽然政府要人买楼可能别有用心，但弊在响香港要保护财富，冇嘢比买楼更安全同老定，全世界只有香港楼最能够保护财富。虽然其他地方例如温哥华都系年年睇住楼价上升，但全世界只有香港系最锡住业主，直情等同受保护动物。温哥华有物业空置税，香港冇。澳洲唔淮外国人买二手楼，买就买新楼。新加坡，外国发展商起完楼要响时限内卖晒，否则罚钱。

　　至於租金管制，德国奥地利都有，唔容许你任意加租。台湾，租金回报一厘都冇。全世界只有香港系对业主最友善，就算冇得炒楼，买楼储存财富，羡慕死唔少外国业主。

　　只要香港仲系嚟住嘅人多过真正离开唔住嘅人，买楼几时都系啱嘅机会大过买错。记住，系真正离开唔住，并唔系谂起想走嘅人。想走嘅人大把，个个都话香港变咗，唔住得人，但系有资格走同真系坐言起行嘅人又有几多？唔好话要走都唔容易，实际上你就算有钱，世界上唔多地方畀你走去住得happy。