展商可以趁机拿拿声卖楼

　　恒生指数收报28692点，升216点，成交1032亿元。盛传长实（01113）以402亿元出售中环中心75%业权，破尽全港纪录，股价昨日微升2.6%。早一个月先至话中央禁止中资走资投资房地产，反而十九大都仲未开，而家可以咁高调用破纪录价买写字楼，呢个财团一定要系央企级数，而且写字楼必定要系认定为具备战略价值，兼且要稳赚不赔。据说财团包括港资在内，要留意边个港资有份。中环嘅资产一直系改朝换代嘅指标，只要中环愈卖愈贵，无论边个卖都唔可以视为睇淡未来嘅先兆。

　　按照林郑月娥接受访问时所讲，佢对「首置上车盘」系有谂法，只系唔想由佢响《施政报告》主动提出，反而想系由社会要求，咁佢就唔会孭上官商勾结之罪名。

　　首置盘要攞地，又要唔影响公营房屋供应，只可以向发展商嘅土地储备埋手。无论你用地价补贴，又或者地积比率放宽，甚至系用公帑起多条路，都有机会引起社会反对。尤其是呢类土地全部都响新界，新界就正正系利益错综复杂，过去几年最有利益输送嫌疑嘅集中地，由佢亲口提出任何方法去攞地起首置盘，都系死路一条。如果由土地供应专责小组同城规会开路，咁佢只系顺应民意，做又得唔做又得。

　　林郑贵为香江第一能吏，如何令自己唔会负上任何政治责任，炉火纯青，唔会急於求成，最紧要水到渠成。之前3个特首，一系乱做，一系乜都唔做，一系就好做唔做。只有呢个，识得可做可唔做，以今日香港嘅政治环境，系咪最适合市民？

　　讲明补地价都唔会提供优惠畀地产商，要视乎什么叫优惠。起条新路，铺多条水管，系便利市民，唔系益地产商，但系基建配套改善，幅地可以起多啲楼，就算要补多些少地价，地产商可能仲赚多啲。政府只系负责基建，地积比率由城规会批，地产商补地价冇优惠，部分楼宇划作「首置上车盘」，政府冇畀过地产商一分一毫利益，但地产商从市场争取到较大利益，冇人可以捉到任何口实。「首置上车盘」系未益中产先利地产商，必定系事实，否则一啲甜头都冇，公私营如何合作？

　　《施政报告》未有首置盘嘅细节出台，让发展商可以趁机拿拿声卖楼，储齐子弹，睇定首置盘细节再出招。地产商卖楼，条数永远都唔够佢计。