绿置居如果唔会增加公屋轮候时间，前设系政府对公屋富户冇计，冇办法令公屋富户交回房屋福利。
用绿置居令公屋富户拥有长住公屋嘅权利，的确系令有需要而冇能力嘅草根阶层轮候时间增加。而如果公屋富户现在住响市区公屋，政府又冇能力赶佢哋离开公营房屋，佢哋又点会愿意放弃咁好嘅福利，走去新界买绿置居？
白居二上两轮共四千几个配额，并非全数合资格申请者都有买二手居屋。肯出让未补地价居屋嘅，一系佢哋有钱可以进入私楼市场，一系老早已经违法出租居屋，另有居所。前者只系购买力换购买力，用唔够实力嘅购买力引出了够实力嘅购买力，提供俾私楼市场。如果系后者，居屋必定善价而沽，企硬唔会减价，因为计划恒常化，唔似得以前只有两轮配额，苏州过后冇艇搭，唔敢赚尽。有理由相信，白居二恒常化，居屋售价会进一步推高，因为只此一次机会，购买力唔会有限额，作为有居屋在手嘅利益者，一定要赚尽先离场。最后，居屋嘅售价会追贴私楼。唔好忘记，居屋无论面积同配套，都会优胜过卖得更贵住得更细嘅纳米楼，未来一年，你会见到更多居屋楼王诞生。
置业系好多市民安居嘅方法，唔使怕加租，唔会俾赶走，仲可以有自订嘅生活空间。但系用公营房屋嚟满足市民置业要求，一系就学新加坡，购买公营房屋本身就系社会主流，而唔系将现有公营房屋嘅模式，一下子变成置业市场。唔单止令政府资源无法用来帮助有需要嘅人，亦令早期受惠嘅市民突然多了一笔横财，早享福利嘅有更大福利，受害嘅依然系而家需要福利，却从来无法享受福利嘅一群。
App下载
