林郑唔见得比梁特有计

　　果然是反高潮，首置上车盘吹到咁行，点知林郑只系有1000个单位做先导计划，细节完全欠奉。

　　要知道首置最重要关节在於点处理补贴问题，转让有什么限制，如何避免成为免费午餐，又唔会令首置变成夹屋，跌市时令业主焗输。冇自由市场嘅置业安排，需要超级智慧同强大政治能力，仲要市况配合，先做到成绩而唔会烂尾收场。一啲细节都冇，证明林郑都未谂掂点搞，同地产商都未倾掂数。

　　又或者，首置的确有如市场预期，未益中产先利地产商，所以唔想主动由佢一手一脚提出，最好先由土地供应专责小组，大辩论之后得出加快农地补地价会系增加土地供应嘅社会共识，有呢个挡箭牌先至搞公私营合作，咁就唔可以话佢官商勾结。明年中先有细节，明年底先用农地补地价，有足够时间畀专责小组做嘢。首置是否就此完结，未可以咁早定案。

　　绿置居、白居二恒常化系今次《施政报告》比较实在嘅方向，但呢两样置业方法都系梁特提出，即是代表林郑都冇梁特咁好计，再谂唔到新桥去解决房屋问题，只可以继续追随上届政府嘅方法。但系绿置居同白居二如果系可以解决房屋问题，咁梁特一早就可以完成任务，唔使林郑出嚟沿用旧桥。

　　绿置居其实系叫公屋富户买入公屋长期居住，正路应该系叫有能力嘅公屋居民出去居屋甚至私楼市场，等公屋资源可以留畀有需要嘅人。绿置居系让部分公屋居民可以永久住公屋，排队上公屋嘅人照系排长龙，没有改善草根阶层住屋问题。

　　白居二证明会推高居屋售价，引发楼价连锁反应。38万间居屋就算可以一次过推晒出嚟白居二，市场都唔会突然多咗38万间二手楼供应，卖咗居屋嘅业主都要搵屋住，卖咗居屋嘅走去买私楼，居住条件随时差过居屋。

　　白居二食咗一啲私楼首次购买力，又释放咗啲换楼购买力，对楼市又有什么影响？咁多公营房屋新花款，只系将件蛋糕打横打直切嚟切去，但要食蛋糕嘅人冇少到，件蛋糕亦冇大件咗，咁楼市同以前有乜分别？房屋问题，林郑唔见得比梁特有计，期望新政府可以解决呢条千古难题，冇可能。