地产博客 > 楼市散打王 返回
浏览人次:11150    回应:3
楼市散打王

首置增加供应,会否推冧楼价?

 

方卓如

2017年9月18日 (信报)

  会德丰抢先表示对公私营合作有兴趣,讲到明大埔洞梓项目可以配合首置上车盘,证明呢个计划未益中产之前,先令地产商受惠,抢住参与。

  公私营合作,城规会过关可能容易啲。公营部分补地价可能少啲,但系建筑成本同私楼相近,咁卖公营楼嘅一部分撇除地价,赚嘅比率可能仲高过连同补地价嘅私楼部分。在农地上用建筑成本起楼再卖,梗系好赚过农地补地价再加建筑成本攞去卖,条数好易计。

  公私营混为一体,首置会唔会推冧同一地盘嘅私楼?唔会,你睇吓康怡康山就知。康怡系私楼,康山系居屋,康山位置比康怡仲好,又近太古城,又近港铁站,但系康山嘅价钱整体系低过康怡,始终系居屋。

  发展商以前唔介意居屋私楼一齐起,而家又点会介意档次高一级嘅首置与私楼共存?只要首置起细啲,装修简单啲,加上政府唔俾你市场转让,首置系唔会完全吃掉私楼购买力。加上有首置做筹码,规划较易过关,仲有首置人士带旺本来系农地嘅偏远地区,方便引进配套设施,卖楼比纯私楼项目更有胜算。

  发展商嘅脑筋,论创新未必够新经济,但论销售策略,香港地产商全球第一,净系睇吓咁多买楼折扣优惠令你唔买唔得,就知道发展商计过嘅数,永冇死错人。首置最叫人兴奋嘅,唔系无壳中产,系持有大量土地储备嘅地产商。

  首置增加了供应,会否推冧楼价?首置本身系唔会,因为首置嘅对象系从未买楼同冇首期嘅中产,佢哋唔系私楼嘅潜在买家。但系公私营合作,与首置同一地盘嘅私楼一齐推出市场,等於私楼因为规划较易过关而供应稍增,咁就对楼价有影响。每年多咗一手供应,总有啲用合理价开盘去货。

  但系楼价不再大升,唔代表地产商赚少咗。建筑成本其实已经系一个固定数目,有升冇减,问题系地价多少,先决定楼盘可以赚多少。假如公私营合作令城规较易过关之余,补地价部分有优惠,就算楼价没有飞升,地产商利润唔一定少咗。价钱卖得唔高,成本低咗同样可以大赚。换言之,计嚟计去,首置点计,最开心都应该未轮到中产。你见最近本地地产商嘅股价,已经反映咗市场都系同样想法。

 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 腥港人 2017-09-18 15:11:12
唔怕比地产商赚钱,就怕唔够货,首置其实系私人参建居屋嘅变体,只系用发展商农地起啫,如果政府够胆开放比发展商收丁屋重建起楼,一样可以起到
2. 路过 2017-09-19 15:38:15
首置增加了供应,会否推冧楼价?首置本身系唔会,因为首置嘅对象系从未买楼同冇首期嘅中产,佢哋唔系私楼嘅潜在买家。

????

写个个系咪发紧梦? 知唔知宜家既新盘(特别提供8成以上借贷上会)买家,首置客占左几多?  根本宜家新盘既TARGET就系呢班你所谓既"未买楼同冇首期嘅中产" 

不过不得不认同一点就系"呢个计划未益中产之前,先令地产商受惠"
但如果计画得宜,相信系WIN WIN WIN局面

1 WIN: 政府解决香港住屋所引申一堆既社会问题,什至政治问题
2 WIN: 香港人居住问题,降低及锁定居住成本
3 WIN: 发展商因近年地价急升,从而增加需补地价发展项目既风险
3. 引刀一快 2017-09-20 03:01:40
依家借埋老窦间屋去“首置”个班健力士创造者,有得拣你估佢拣边样?