港灿式茶餐厅 你唔飞，我飞。

   近排香港仲喺度热议紧呢个大填海，不过，填唔填唔到你俾意见，填得嚟，何守信汪明荃都死咗喇，真系有百二岁嚟等块沙地起楼咩？

咁香港飞地又有冇可能呢？近排好似冇乜人讲呢样，就算讲，都系打深圳主意，咁就真系唔使谂，深圳系一个狼性嘅社会，对比香港呢个温室花园，唔吞咗你都祗系因为时机未到咋，地方咁矜贵又点可能俾一忽你？一忽仔都唔会益你。

上年年中，深圳搞咗个“深汕特别合作区”，将汕尾海丰嘅鹅阜、鮜门、赤石、小漠四个镇食咗，跨过惠州飞地，与深圳市中心距离约100公里度，一通高铁，唔使半粒钟就到。

唔好睇见个“镇”字，就以为好少嘢，总面积一共468.3平方公里，超过三分一个香港，而且系有优质淡水资源嘅区域。咁点解深圳唔直接蚕食惠州，而要飞地去汕尾呢？我相信系步骤问题啫，深圳真系深谋远虑，非常有狼味，先跨过大亚湾巽寮湾惠东，去攞几块巨大山旮旯，系舍难取易，攞一块本来唔属於大湾区嘅地方，然后将佢归入大湾区，一旦搞起咗，往来越来越频繁，中间嘅地方就易攞得多，结果，沿海都唔知几多百公里海岸线都系佢嘅。至於惠州，早就系买唔起深圳楼嘅人上车之选，香港就系缺咗咁样嘅一个地方，唔使出关又通地铁，人口流动自由。

果啲千零公顷嘅计划，同人地飞地比，完全系蚊髀同牛髀，将来深圳要发展乜都好，要地有地要人有人，要水有水，要海有海，要海鲜有海鲜，仲唔使俾填海钱。唔使好似香港咁谂到冇得谂，填船湾淡水湖铲高尔夫球场，损害咁深但又可以应付问题几耐？再者，到底香港系咪应该一直被动应付，还是要主动创造条件去保持区域优势？

深圳飞地，可以预见深圳发展嘅可能性会因此得到极大增强，而且绝对唔止量，仲有质，不单广，还有深！当一个地方得到中国各地不同层次嘅年轻人大量涌入，而呢啲年轻人有合理嘅居住条件，有广阔嘅空间去实践计划，活力点会唔发挥？

香港一直喺度食老本，其他嘅城市就不断积极拓展，如果继续怀住呢种自满嘅心态故步自封，恐怕唔使到2047，香港就优势尽失，仲有乜揸拿期望阿爷俾你续期。

不过，机会还在，珠海、佛山、惠州、中山，无论位置、人口、连港交通暂时都仲系有飞地可行性嘅四个城市，江门稍远，广州人太多，反正港珠澳大桥起咗，上巴士瞌一觉就到飞地，同以前入屯门差唔多啫。香港今日喺法治、平均个人质素、等等，依然有一定嘅优势，唔好嘥咗佢，好好利用呢啲领先嘅基础，借飞地配合，开拓新一啲嘅优势，最起码保持不落后吖。

最后，系咪应该讲句，要珍惜香港呢？