地產博客 > 絲絲細語 返回
瀏覽人次:13473    回應:4
絲絲細語
3000 vs 690
 
左丁山
2018年8月21日 (蘋果)

  在投資論壇碰到陸東,陸東公開講佢個人揸得最多嘅股票,只買不賣嘅,就係港交所與金沙。港交所大家都明白吖,博呢隻股得益於未來滬港通,深港通,以至債券通各方面大大增加香港市場成交額吖嘛,咁講係長遠一啲,但投資策略之一就係長期持有,唔好成日做即日鮮,月月鮮,成日掛住換馬,否則猛咁蝕交易費用,甚至左一巴、右一巴,好時年,得個做字,環境逆轉就得個蝕字。

  金沙呢?陸東話根據拉斯維加斯幾十年來數據,賭場長期表現靠博彩以外嘅收入,當然,貴賓廳收入,中場(散戶)收入係好重要,但博彩銀碼長期嚟講會達到天花板(ceiling),於是聰明博彩公司會盡量發展會議、酒店、家庭娛樂及演唱會等業務。呢方面,美國金沙做得最多最成功,正在將經驗轉移至澳門金沙,已初見成效,故此呢隻股值得長期睇好咁講!

  陸東係以前瑞銀嘅星級分析師,現在係中港通資產管理有限公司嘅首席投資總監,買賣股票叻過一般人,既然夠膽向幾百人出席嘅論壇公開講,「港交所、金沙,我揸到一褲都係!」可見信心十足,那理得短期股價波動。問佢貿易戰等事,佢話投資市場總會不時出現風風雨雨,長期投資者最緊要企定,唔好畀人震倉!

  長期樓價又點睇呀,陸東指出,本港樓價與中位入息比率已經高達19.4倍(2017年年尾數字,現在更高),創歷史新高;家庭負債與本地生產總值比率在2017年底升至69%,係歷史新高,總不能不調整而不斷上升啩?陸東言下之意,就係本港樓價越來越臨近調整邊緣,催化劑可能係加息。財政司司長陳茂波出席論壇致開幕辭,本以為佢講五分鐘客套話就過場,點知司長好認真咁檢討本地GDP第二季數據、今年趨勢,跟着講埋美國九月多數加息,香港要看情況跟隨。我哋睇司長之講話神情與身體語言,在現場感受到今年九月本港銀行好難唔加息咯,如果聯儲局加息嘅話!上星期已有幾間大銀行增加P按、H按利率,到咗9月,滙豐、中銀、恒生嘅最優惠利率大有可能調整上升0.25厘,或會影響樓價升幅。目前香港樓價點解咁堅?除咗超低息環境之外,陸東提出了兩個數字;1985至2000年,香港填海3000公頃,此段15年時期,樓價穩步上揚至1997年爆破;由2000至2015年也是15年,期內香港填海690公頃,只係前15年之23%,而樓價大幅度上升,遠超九七年水平,道理一字咁淺啦,土地供應不足,預期樓價必漲!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 雙重才是標準 2018-08-21 10:25:59
呢位基金經理由大舖跳出嚟自己開檔嗰陣,好似輸到一褲都係,之後個fund仲賣埋盤。生意果然難撈。
2. 引刀一快 2018-08-21 13:51:05
香港連咗落6萬平方公里嘅土地,唔夠?咪傻喇。
3. 真真薯片 2018-08-21 20:29:24
呢個阿東仲好意思出黎講樓市………
4. 唔夠!真係唔夠!! 2018-08-21 20:59:09
香港連咗960萬平方公里土地,應該夠。可惜設了關口,關口的這邊冇假食品毒食品,而關口的那一邊連疫苗都假,搞到兩邊樓價差好遠。未來三十年看不到有解救。