上星期日早上讀蘋果日報蔡瀾講在外地買樓,寫得好過癮,深有同感,在外地買樓,若非移民長住,而係學吓外國概念,搞個second home嘅話,成本其實好高,淨係物業管理費,屋內清潔工作,已經有排煩,租出去作「時間分享」收租或Airbnb,又驚住畀短期租客搞污糟間屋,擔驚受怕,何苦來由哉。用幾百萬買一個單位在曼谷、新加坡、雪梨諸如此類,一年去住得幾多個月呢?計起條平均數,可能每次去住不同五星酒店豪華套房,住住埋埋都唔駛幾百萬港紙。 讀報半小時,肚子餓了,讀蔡瀾,醒起蔡瀾於農曆年間,曾送來幾包「蔡瀾監製抱抱麵系列之葱油拌麵」,於是拿一包出嚟,用滾水煮麵,但雪櫃冇乜肉片喎,唔通食齋麵,忽然睇到有樽日本味噌,係留學慶應嘅崇基校友船務A送嘅,佢話呢款「土佐香味」味噌由佢退休後設立嘅公司代理嘅,食咗對喉嚨有好處,於是成樽倒落去,味噌蔡瀾麵,再加兩三塊北海道紫菜,嘩,不得了,十分好味道,濃郁微辣不鹹,出街賣四五十元一碗,包保舖頭門口排長龍,抱抱麵煙韌有咬頭,紫菜味噌湯成為絕配。下次見到船務A,要問佢買咯,成日送就唔係幾好意思啦。 船務A精通日文,自崇基畢業後得日本文部省獎學金往慶應留學,娶埋日本太太,於是成為日本通,當年跟中大同學大隊加入金山航運集團,後來成為董先生得力助手,退休後,半年居日,半年居港,在東京買樓就好啱用嘞。現在開咗一間日本食品公司,搜羅不同日本地道之食品運港做批發,我地身為中大校友,當然久唔久就有好嘢攞到。 食完之後,小Y Y自澳洲公幹回港,來短訊話:「雪梨食餐好貴,吃不消,物價亦貴,點樣宜居呀?」宜居者,就係蘇黎世湖邊別墅,或墨爾本河邊大宅,與香港納米樓之分別,以及空氣、綠色環境、文化藝術、戲劇音樂節目等等嚟決定邊度最宜居嘅。叫孟買、拉哥斯嘅普通居民比較吓何謂最宜居,答案截然不同,香港是否宜居呢?計左丁山話,宜居到極,只要你有公屋或居屋或私樓嘅話!衣食行三件事,在香港最方便簡單,好過全世界,唔信睇吓劉以鬯先生,在香港可以安居至99歲,了無遺憾,若非及早離開上海來港,未必有此福氣。
上一則:
下一則:
Javascript must be enabled to use this form.