地產博客 > 絲絲細語 返回
瀏覽人次:12943    回應:3
絲絲細語
建造界之失(上)
 
左丁山
2018年1月13日 (蘋果)

  袁國強走人,鄭若驊走馬上任律政司司長,點知宣佈之後第二日(1月6日)就被傳媒篤爆住所有僭建,全港記者空群而出跟進,令到特區政府灰頭灰臉。林鄭月娥聽講好屬意鄭若驊做律政司司長,替代袁國強,袁國強一聲辭職,就由佢頂上。既然如此,點解林鄭特首辦唔一早在品格審查之時,查清查楚,事先清除鄭若驊之「政治負債」呢?鄭若驊又唔及早為自己做「政治檢查」,預備傳媒狙擊呢?唔通整個過程是急就章,講兩句就拍板?


  現在搞到咁尷尬,傳媒攞足料,部署好,等一月五日宣佈委任司長,一月六日就用頭版招呼,一巴掌打得好應,兩位鄭女士唔面皮痛就假。事件說明,林鄭特首欠缺籌謀,特首辦主任及其他辦事人護主不力,完全無料到。有冇建制派人士出嚟護駕呀?因事情太明顯,民建聯工聯會唔見力撐,只有范徐麗泰為鄭若驊講幾句說話,指鄭若驊不須辭職,又指罵鄭之人要檢視吓自己係唔係百分百清高。


  建制派除咗識聽中聯辦吩咐之外,能夠出來講說話嘅,只得范徐麗泰、梁愛詩、譚惠珠三位長者女士,一位老友話見佢地三位輪流上陣護航,就諗起「楊門女將」,楊家男將死晒,要由老太婆佘太君出場鎮住,都幾悲。今時今日之香港35歲以下一代,有邊個一見到建制派三太君,唔立即退避三舍㗎!


  前一輪,左丁山陪一位工程師去睇樓(工廠大廈),佢一行入去轉個圈,就話呢條柱唔好,嗰條橫樑有些少問題,而左丁山就乜都睇唔到,唔明白佢講乜呢!鄭若驊係特許土木工程師噃,現任丈夫潘樂陶係電機專家,前工程師學會會長,潘鄭夫婦在建築工程界無人不識,精明到極,買獨立屋而唔知有僭建?即係話左丁山唔識寫字啫,講吓都係對潘鄭夫婦嘅專業知識侮辱。本來香港到處有僭建,買到有僭建嘅單位都唔奇,唔應該話佢地錯,香港居住環境就是如此。不過呢,大鑼大鼓話要拆屋宇僭建物嘅就係曾蔭權特首之發展局局長林鄭月娥,2012年特首競選,大力以僭建理由,摧毀唐英年嘅就係林鄭月娥,依家佢做咗特首,唔通已有精英心態,有雙重標準,對屬下律政司司長鄭若驊之僭建屋視若無睹?唉吔,要為唐英年呼冤呀。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 香港人自作孽 2018-01-13 10:24:57
香港社會現在搞文革,日日在三反五反,沈迷政治鬥爭。為咗僭建這種小事,民意反唐而改為支持CY做特首。結果求仁得仁。香港人自作孽不可活,底x死!
2. 香港人自作孽 2018-01-13 11:34:04
香港社會現在搞文革,日日在三反五反,沈迷政治鬥爭。為咗僭建這種小事,民意反唐而改為支持CY做特首。結果求仁得仁。香港人自作孽不可活,底x死!
3. 孟波 2018-01-13 14:08:44
幾時香港選特首係由民意可以左右的?