沙田第一城1018呎(建築面積)單位連天台,高層向城門河,露台可遠眺馬場及體育學院,景觀相當好,但以1250萬出售,呎價卻高得驚人(按:已因DSD撻定),1980年售樓花時,同類單位約售110萬,1982年下跌至70多萬,35年間竟上升15倍,令人驚嘆,香港樓價若以同樣增幅上揚,35年後,即2053年,同樣的單位豈非價值1億8千7百餘萬?想一想也會腦筋失常。左丁山的孫兒到時不知棲身何處,怪不得一位前輩開玩笑:「左丁山,別再說買樓靠父輩,你快為孫兒籌謀,買一個上車盤先!」
孫兒之事,點理得咁多,由佢地父母去傷腦筋好了。假期上網,在彭博看到外地十大世界矚目豪宅售價,由加勒比海小島、至洛杉磯比華利山、至三藩市市中心山頂Pacific Heights,及紐約中央公園西或摩納哥中心區域,面積由五六千平方呎至七畝八畝花園獨立屋,擁無敵海景、公園景,最高售價不超過七千萬美元(不夠5億5千萬港元),可說相當便宜!
與2017年香港的耀眼矚目豪宅成交價比較:
(一)赤柱舂磡角獨立屋,15.88億,(二)Mount Nicholson12樓CD室11.65億,3號屋11.64億,1號屋10.8億……(三)渣甸山軒德蓀道4號,6億。
去年20宗大買賣,最便宜的一宗也超過5億6千萬元,比所謂「世界矚目豪宅」貴,以呎價論,香港價格更遠超三藩市Pacific Heights與紐約Central Park West,是否真的物有所值?內地客最不缺的就是銀紙,為何不到紐約、羅省、三藩市買豪宅,反而委屈地在Mount Nicholson買屋?香港有何特別之處,令內地大豪客垂青?左丁山諗唔通,因為自己如果有七億銀買住宅,世界上有大把城市,包括富豪「集中營」摩納哥在內,都可以買到比聶歌信山或渣甸山更靚更大嘅獨立屋。將十億銀分為三份,在倫敦、巴黎、摩納哥買齊三間豪宅都得。
不過一位地產界老友就話畀左丁山聽:「香港有地利吖嘛,一來係中國最先進城市,中國最自由城市,中國最西化城市,住在香港遙控深圳、上海及沿海一帶生意網十分容易,又有一流飲食、航空交通方便,上網乜都睇得到,比住在上海、杭州過癮好多,送老婆仔女去外國應付突變,更相對容易,左丁山,明白未?」唔,的確思維不同噃,人地要行多三步棋,於是肯付出溢價買樓,香港啲old rich,大可乘機變現,去倫敦買一間更大嘅!