昨日講及有人建議在公共屋邨推廣網購，以抵制「領展霸權」，其實網購就網購，唔駛提升到甚麼領展層次，以前左丁山在本欄講過，置富產業信託投資基金（778）收購咗沙田第一城商場，一城居民最好買置富嚟對沖商場加租，呢隻Reit果然之後係咁升，最近做9.5元，一位城民買咗，笑到依家，啲屋邨富戶如果老早買咗823，依家更加笑得開心。這就是英文所謂If you can't beat them, join them嘅道理！
冇錢買股票喎，咁又點？好易啫，一於網購，唔好畀領展商場啲店舖做到你嘅生意，間接令領展唔敢加租。左丁山周圍有不少人上網買嘢，其中以淘寶最流行，記者K話畀左丁山聽，佢上淘寶買醬油，買麵，及其他食物，比本港超市便宜三四成，買隻熊仔玩具畀小孩子，只需25元，而且由順豐送到上門，交通費都慳番。咁講法，唔怪得睇到隔籬有一間寫字樓，日日有順豐速遞員拍門送貨，啲女士係最熱心顧客。
小YY就上不同網站購物，由美國公司到淘寶都幫襯，根本不再往商場「血拼」。事實上，網購在40歲以下
一代，已蔚然成風，不需要政府在公共屋邨推動，年輕人自然懂得。網購豈止可以抵制甚麼「領展霸權」，正如馬雲豪言：「如果不能打敗商場，是我們一代的失敗！」信不信由你！前內地首富王健林曾講過要與馬雲決一高下，王健林係大地產商，現在已經冇晒豪情豪氣，低調不見人了。
香港則地細人多，人口密集，梗有商舖在附近，落樓買麵包，買啤酒，非常容易，因為咁，居民就覺得網購仲冇咁快，於是大規模網購至今在香港還未到極流行階段，加上大量內地遊客喜歡在香港購物，於是一級本地商場仍然有其價值，租金高企，但旅遊區之外的二三線商場，恐怕會逐漸走下坡了，一個大膽預測就是以高價買入領展出售的二線商場的投資者，未來的回報（以IRR計算），不會太理想，頂多是穩定而已；淘寶以超級便宜的價錢售貨，如能長期如此，本港零售商根本難以匹敵。至於為何淘寶的售價這麼低，內裏有何原因，消費者是不理會的。因Amazon收購Whloe Foods，阿里巴巴與騰訊在內地也與實體店結盟，實行網上網下連為一體，結果將是其他無網上支援或單打獨鬥的連鎖店又勢將陷入苦戰，到頭來，香港可能沒有了地產霸權，卻迎來雙馬霸權！
App下載
