地產博客 > 絲絲細語 返回
瀏覽人次:5383    回應:0
絲絲細語
土地供應專責小組
 
左丁山
2017年9月9日 (蘋果)

  政府成立一個「土地供應專責小組」(Task Force on Land Supply)由非官方成員22人,官方代表發展局、環境局、運房局三位局長,加上發展局常秘(規劃及地政)、常秘(工務)、土木署署長、地政總署署長、規劃署署長,共八人合組而成,過去同類專責小組多由官方代表做主席,但呢一次就由民間人士(黃遠輝)做主席,似乎顯示咗林鄭月娥嘅新作風,有意打造一個民意主導嘅形象,將來無論土地供應專責小組提出甚麼建議,凡有大爭議性嘅,特區政府都可以推得一乾二淨。

  左丁山認識黃遠輝二十幾三十年,久唔久就同佢一齊參加一個私人聚餐會,對佢有啲深入了解,知道此人公道公正,老實得嚟有腰骨,可堅持原則,如果佢想做官,一早做咗啦,但佢自銀行界退休後,成為公職王,一心一意只係想為社會服務,做「無糧」工作,不願入政府領取高薪,故此好得到朋友尊重尊敬。

  不過即使如此好人做土地供應專責小組主席,仍然左右做人難。目前香港一方面有房屋供應壓力,商廈商場文娛設施壓力,對土地需求,空前龐大;第二方面,香港之環保、保育及地方勢力亦相當龐大,政府無論填海,開發新界,造地,市區重建,發展棕地,打郊野公園邊陲土地主意,都會遇到頑強抵抗及司法覆核,可說寸土皆辛苦,得來不易,呢個土地供應專責小組開會時無吵鬧之聲,先至係奇蹟。

  左丁山最近講過,聰明政府要干預甚麼,唔駛打電話發指示嘅,只須在委任人選時,有一套既定方法就得。試睇吓,22名非官方成員之中,贊成增加土地供應嘅人士,佔咗大多數,環保聲音有而不多,起碼啲強硬派如朱凱迪,譚凱邦冇份,較溫和啲嘅學者派姚松炎亦被拒諸門外,故此特區政府從委任甚麼人入呢個小組,已經知道小組成員會獨立運作,不受政府「干預」,但未來提交報告嘅內容,必如上訴庭對「一鼓歪風」之見解,深受政府歡迎。黃遠輝做主席,自然有個人見解,但少數服從多數,佢將來係要負責解畫嘅嘞,左丁山認為當今香港之最大土地矛盾在乎環保與保育與增加土地之事相持不下,專責小組如能透過內部討論及公眾諮詢之後,提出各方面可接受嘅方案,解決這個香港大矛盾,功德無量!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼