地產博客 > 絲絲細語 返回
瀏覽人次:18693    回應:25
絲絲細語
買樓DNA
 
左丁山
2017年6月19日 (蘋果)

  香港迪士尼樂園位於大嶼山欣澳,好似好遠,其實從好多地區去欣澳,只不過30分鐘車程,頂多係45分鐘就可揸車到酒店門口,比去外地快好多。但酒店房間幾貴噃,房租一定高過曼谷與台北四星酒店。泰國R幾日前吃午飯時先至講及:「喂,你應該多啲去吓曼谷啦,酒店好平㗎咋,好抵玩。」同大記者講起去迪士尼嘅餐費(一家八大三小共吃了早午晚三餐共七千五百元),即刻話:「去台北度周末可能仲便宜一啲。」此則見仁見智,照左丁山睇,台北冇一間酒店有迪士尼咁清靜,咁好環境噃,而且幼童去台北其實冇乜地方好行,家庭樂談不上,年輕夫婦去台北逛書局嘆小籠包就好正。

  沙田陳太嘅一位親戚I就與家姐同去倫敦,兩姊妹到倫敦翌日,就發生倫敦橋恐襲,雖然無事,卻嚇咗一跳。親戚I回報:「好彩我同家姐一心去睇樓,約咗一個經紀去住宅區,冇去到倫敦橋影相啫。」香港人現時去倫敦,一個流行節目就係睇樓,當香港納米樓要賣萬幾蚊一呎之時,倫敦樓就變得好吸引。親戚I由Notting Hill睇到Chelsea,Bloomsbury,發覺豪宅太貴,係強國億萬富豪先至可以有得諗,但香港中高產人士亦有大把選擇,一啲距離帝國學院十個地鐵站嘅排屋只售一百萬英鎊多啲,搞到親戚I家姐心郁郁,乜唔係啫,北角丹拿山一個舊樓單位都要一千萬港元,不如換樓好過。

  去倫敦買樓唔好講到移民咁嚴重,其他理由有好多嘅,最常見最容易嘅理由就係子女去倫敦讀書,要搵地方住,而倫敦房租貴,不如自己買番一個單位俾子女住,慳租兼希望保值,升值。老友印刷L十幾年前就係咁樣做,先知先覺,賺到笑。親戚I家姐就因為兩個仔女在英國讀完醫科,不能返香港做醫生,留在英國加入NHS系統行醫,其中一位娶咗一個物理治療師,但因為倫敦租金貴,醫生薪水低,住唔起倫敦,要搬往一小時火車車程以外嘅小城,等於叫一對香港醫生護士夫婦搬咗去東莞住,日日坐火車到九龍伊利沙伯醫院返工。有說香港年青人因樓價貴,睇唔到前景喎,英國年青醫生何嘗可以住在倫敦市內?買樓買地,深入香港人之DNA,最近知道一位大學畢業生與同學到峇里島作畢業旅行,竟然將兩年兼職工作積蓄,買咗一幅地,理由係十萬元在香港乜都買唔到,在印尼可以買到屋地,一於博一博!左丁山佩服佢勇氣可嘉之餘,亦感覺到對香港人來講,人生最大目標就是一層樓,多謝梁振英啦,佢任內香港樓價創歷史新高呀。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2017-06-20 03:46:40
講來講去都係講外國置業,點解唔攞大灣區做對比?

既然45分鐘去迪士尼酒店都覺得快,咁高鐵48分鐘到廣州南站都唔係耐啫,迪士尼酒店住一日,大灣區好多地方夠交一個月租,而且食得好。



2. 路人xx 2017-06-20 07:58:37
要數地產網嘅agent,最hard sell嘅,非引刀無疑。🤦‍♂️
3. 望東樓 2017-06-20 08:28:22
小刀,不如你寫返幾篇嘢介紹下大灣區點好吖?
4. 自我陶醉 2017-06-20 09:50:23
喜歡去歐美旅遊嘅人,在英國買樓hea吓,的確係唔錯嘅選擇,英國大把去歐洲各國嘅廉航,三幾百蚊有交易,還可坐船坐火車去法國,超方便,除咗倫敦外,三百萬樓下都可能執到間獨立屋,仲要係freehold,  即係連塊地都買埋,永遠唔洗交地租,只係香港半間納米樓價錢,真係諗得過。
5. 屎忽上腦 2017-06-20 10:34:29
正一屎忽上腦,睇到最尾果兩句,原來又係青山出來的,哈哈
6. 正一屎忽上晒腦 2017-06-20 10:36:21
唔講最尾果兩句,毒果唔出糧?
7. 十一哥 2017-06-20 11:18:51
刀刀…係世外高人、來去皆騰雲駕霧、不吃人間煙火、時間…佢可以循環再用、爾等凡夫俗子…識享受咁嘅境界咩!



8. 十一哥 2017-06-20 11:55:47
左仔    講到尾都要棟CY一嘢、冇你老友假鬼曾做嘢、任內明益老友、居屋唔賣…變私樓、停哂手公營房屋、點做就下手面對低息…谷高樓價呢!

坦白講…都要多謝假鬼曾嘅、多得佢…我地先可以座定定…乜都唔洗做…身家自動係咁番幾番吖。


9. 引刀一快 2017-06-20 12:11:58
東樓兄

我想寫下大灣區嘅,不過一開始寫就發現,原來大灣區嘅嘢,寫五十篇都寫唔晒,而且需要蒐集大量資料,否則難以完成一篇見得人嘅大灣區文章,所以hea到依傢都未出文。
10. 引刀一快 2017-06-20 12:14:24
琳琳

我嘅時間唔係循環利用,祇係“善用”啫,依傢有手機,一兩粒鐘車程完全可以充實地過,再唔係就瞓覺,有咩問題?
11. 引刀一快 2017-06-20 12:18:02
路人XX

你可以駁我嘛,閙人都冇D技術含量。
12. Jon 2017-06-20 13:02:07
你可以由广州写起,其他师兄有兴趣接力,惠州,珠海,深圳一路落去。
13. onclerkclerk 2017-06-20 18:14:28
我在九龍舊區有個千呎單位,在英國中部已可買五間house 屎了,英國始終是英國,藍天白雲,青山綠水,揸車讓人,鬼妹见面微笑.say hello ,大湾區在人,食物等之質素冇得揮。
14. 引刀一快 2017-06-20 18:20:21
Jon兄

我夠膽寫都係寫廣州咋,其他要親身行過先算負責。
15. onclerkclerk 2017-06-20 18:24:10
英國去法國也方便,飞机票幾舊人仔,但歐洲比英國熱及左軚,不喜歡。
16. 引刀一快 2017-06-20 18:29:01
onclerkclerk 兄

點樣冇得揮法呀?大灣區冇藍天白雲?鬼妹笑完會唔會嫁俾你呀?去一次英國坐幾耐飛機?幾錢機票?哈哈哈

原來兄台鍾意鬼妹say hello,唔好意思,大灣區依傢都唔少鬼妹喎,不過人地講國語問好。
17. 引刀一快 2017-06-20 18:32:01
如果講食物質素,我唔覺得珠三角會輸蝕俾全世界任何一個地方。
18. 向引刀‧土著‧自醉‧浪子‧阿井 說不 2017-06-20 20:07:15
傻燦,最近去廣州,特意去食了一次相傳是舊清平飯店出來的師傅做的,其三間之中的一間,妄想尋回當年特色美味的記憶。

食了之後發覺,真系有冇搞錯呀?!與十幾二十年的感覺,有着天淵之別;
1. 雞隻肥大骨粗而皮厚,肯定不是以前的走地雞,用冰鮮雞早已有了心理準備,
2. 煮到隻雞完全熟透,啲雞肉又韌又嚡唔入味,唔夠雞味,完全冇咗滑嫩爽口多汁入味感覺,
3. 都唔知點解,白切雞雞骨完完全全睇唔到鮮紅血,煮到熟晒梗係韌啦。即時請教隔離台,原來廣州的白切雞,被不熟悉廣州傳統美食風俗的人,向衛生部門投訴得太多,雞骨中的血液未熟透,會產生禽流感相類型病患,對健康帶來不良效果,所以勒令全市食肆白切雞一定要煮熟煮透,才可奉客。
4. 以前的清平雞骨細軟易咬,連雞骨都有味為叫好叫座的招牌手藝,今次咬都費事咬了,食肉已知雞骨味。
5. 食畢之後被問及與以前記憶中的感覺對比打分,怕唔好意思,講就80,心裡評價68啦。
19. 引刀一快 2017-06-21 00:57:58
說不女

大陸形容呢種情况,叫做“人品問題”。

你篇嘢係咪剪貼㗎?既然你咁有雅興講食,可以討論下,你去搵清平鷄食,即係對廣州嘅印象停留喺廿年前,好懷舊,我早就已經忘記咗佢,唔係因爲試過失望,而係因爲依傢到處都係靚雞,邊有咁神心特登走去上下九吖。

至于你話用冰鮮鷄,咁就即係連一般飯店嘅水平都冇,係飯堂級數。點解你搵到隻咁拽嘅雞嚟食?

我平時喺食肆食雞,水平有高有低,但係好難撞一次好差嘅。
20. onclerkclerk 2017-06-21 02:10:14
我在深圳也有幾套房子,但人,水,空氣和食物跟歐美差九條街,每次回到英國心裡才踏實。
21. 引刀一快 2017-06-21 02:26:52
咁你D屋一定唔係福田南山。
22. 向引刀‧土著‧自醉‧浪子‧阿井 說不 2017-06-21 07:24:30

邊間出品無謂講喇,之後行過西關飯店及燒臘鋪,望一眼櫥窗,雞骨都是不帶鮮紅血,你可以視而不見死雞撐飯蓋,不過美食穗港兩地係有分別,都係香港好。
23. 是但 2017-06-21 09:58:36
引刀師兄大陸咁熟。

真心希望Ching能用數據加經驗分析大湾區投資地產方向。




24. Ong Aw 2017-06-27 15:04:39
笑完大陸豆腐渣工程,你估狐狸國淨係得一座炭燒流料大廈?移民去倫敦買樓啦 !
25. 引刀一快 2017-06-27 15:32:49
嘥氣喇,說不女,返大陸食過嘢嘅人千千萬萬,妳鐘意咪彈到夠囉,我就日日都食得好。