地產博客 > 絲絲細語 返回
瀏覽人次:35366    回應:3
絲絲細語

香港直情係內房大亨嘅天堂

 

左丁山

2017年5月23日

  呢日搵一份文件,搵唔到,不知放在那裏,於是索性打WhatsApp去某公司嘅機要秘書K,請佢補發一份,趕快傳真過來。唔夠兩分鐘,秘書K來電:「左先生,你係唔係要補發一份甚麼甚麼,係唔係傳來短訊?」都幾多此一問,左丁山話:「係呀,係呀,K小姐,得唔得呀?」秘書K猛咁笑:「呢排電話騙案多,我驚你個電話俾人hack咗,呃我攞文件,所以即刻打電話嚟搵你對證!」咦,又係道理,秘書K真係醒目過人,抵請佢飲茶。時下電話電腦騙案特多,有時確係不可不防。睇番不少個案,被騙幾十萬以至上千萬者,幾乎全部係內地來港學生或有內地聯繫嘅移民,何以如此湊巧?諗深一層,電話騙徒其實專門向內地人埋手,箇中原因,不難明白,騙徒用電腦隨機撥電話號碼,聽見答話者係純香港廣東話口音,就知道難以入手嘅咯。

  內地文化係相信有錢使得鬼推磨,違法之事可用賄賂搞掂,做過甚麼心虛事,俾「公安」(無論真假)打電話嚟警告恐嚇,咪即刻磅水,希望消災囉,香港人聽到呢類言詞,第一個反應就係去報警,邊會咁易上當吖。一位朋友前年入內地一個中部城市搞設廠,實質係買地,點知一開波啫,在在需財,唔係真正成本呀,而係四方八面有份發出批文印章嘅單位都要應付,不能讓人空手而回,朋友還未開廠,已經超支。講起來,朋友就要讚番香港:「我依家好明白內房公司來港搶地發展嘅理由嘞,在香港買幅地,以前講公開拍賣,現在係投標,攞到幅地,大把律師、建築師、測量師、工程師、物業管理公司、項目顧問為你服務,全部收費不會包含禮金、禮物、利是、賀金、天價飲食、美女卡拉OK,諸如此類,幾舒服呢,起好樓之後,水電煤公司第一時間同你鋪設喉管,唔駛你去上門拜請!香港直情係內房公司大亨嘅天堂,既然有錢,唔嚟香港搶地就笨!」調轉頭就難啲,香港地產商唔熟悉上面拜門(或知道都唔敢做得咁大膽)嗰套,到內地搞建設,競爭力係差一啲嘅。香港與新加坡應該係一帶一路地區中最講求清廉嘅地方,故此中國斥資萬億推動一帶一路建設,第一批受益人一定唔係港商,一帶方面嘅國家話事人員,可以去新加坡開定銀行戶口咯,佢地先至係高高興興高呼習主席英明嘅人士! 

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. Tony lam 2017-05-23 11:49:04
香港…攞到幅地,大把律師、建築師、測量師、工程師、物業管理公司、項目顧問為你服務,…冇價講…不過用專業包裝型仔好多…簽名費好很貴。

大陸…禮金、禮物、利是、賀金、天價飲食、美女卡拉OK,…冇包裝…有價講…計落相對平好多。

唔好扮哂嘢…以為香港好乾淨呀!起橋單嘢…啱先拉咗條友、BMW掘地窿單嘢…班專業乜師物師…真係乜都唔知 ?

天下烏鴉一樣克、香港人勝在…古惑識包裝…呢方面叻過老表咁解啫 !


2. 向飯民說不 2017-05-23 19:17:04
老美将贪污合法化 ,所以老美无贪污。大把肥到流油的慈善机构。
当年的玫瑰园计划,英国鬼A走几百亿。
深圳已经有火车直通欧洲啦。你地班黄c写手吾好在破坏香港啦。
当年英国鬼来香港积极的搞Kowloon Canton railway, 没有想黄c 人渣会反对高铁。
3. 老記 2017-05-24 16:14:48
惜日華資老將所走的路, 不正是今天年青內房必經的?
江山代有才人出,各領風騷 數百年。