地產博客 > 絲絲細語 返回
瀏覽人次:13080    回應:0
絲絲細語
樓市反彈
 
左丁山
2019年3月14日 (蘋果)

  近日碰到「黃金五十」創辦人林奮強,佢最近最關心嘅就係樓市按揭上限及香港醫療緊張問題,其實「黃金五十」創辦之時,佢地已經出咗一份香港醫療報告,主張向新加坡取經,輸入醫護人員,加建醫院,為醫療體系擴展,當時係2011年,適值唐英年與梁振英競逐成為特首,爭到白熱化之時,唐梁兩人陣營都有請林奮強去演述「黃金五十」之經濟及醫療報告。

  眨吓眼已經過咗8年,「黃金五十」之報告預測(樓市必升,醫療必定爆燈)果然全中,但最可惜嘅係,「黃金五十」報告之應對方法(增加土地供應,輸入醫護人員,增建醫院),至今還是得個講字,正合乎一句:議論未定,兵已渡河,今天大難題打到埋身了。

  今天林奮強已受委任加入醫管局董事局,睇得文件多,對醫療問題看得更深,所以愈係對住老友記嘆息。樓市又點睇?林奮強話:「我再唔睇樓市分析咯,唔再講,淨係睇經濟數據,香港土地供應,樓價係好難跌嘅,我最痛心者,就係金管局死要嚴限樓市按揭上限,令中產及四十歲以下專業人士難以換樓,上車,金管局有負香港人,抵鬧。」

  左丁山同意要放寬樓按上限,但呢個政策是否真的由金管局決定吖,還是金管局在梁振英特首時期聽從特首意思至今,緊跟政府之所謂「逆周期措施」而訂立㗎?左丁山好懷疑金管局有無能力反對特首及財政司之政策,你估金管局真係似聯儲局咁獨立於白宮之外?

  嚴限樓按上限為中產階級所不喜,左丁山接觸年青專業人士多,認為反樓按上限五成係主流意見。但從政治嚟講,大凡公共政策一經定下,就極難極難改變,普遍係繼續維持,因為從政者及領導人不會願意推行政策改革及面對政策變更後之後果,例如聯繫滙率1983年由港英政府、英國首相府及北京鄧小平同意之後決定下來,今天邊度有人夠膽話改變?

  在現有條件之下,市場形勢已變,樓市最近反彈,一啲本來睇淡嘅分析師,最近又要改口。原因好簡單,美國已鐵定2019年難以加息,金管局過往兩年念念有辭話加息周期已至,已被事實粉碎,再講加息就係笑話,大家都知道按揭利息會繼續低迷,有利樓市,而失業率亦低,人人有工做,都係支持樓價再反彈嘅因素。最近有不少新春酒會,見到地產代理老闆講:「前綫經紀回報,過年後,業主紛紛反價,要加價,速度之快,連我都以為夥計開玩笑,但真係有成交噃!」

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼