物業代理可以放大假

　　星期二，當政府公布恒基以232.8億奪得中環美利道停車場，平均呎價超越5萬，全城嘩然，在公布之前，我正洽談兩層商業甲廈，物業代理叫我先俾offer，星期三就會有答覆，我同物業代理講，如果我先俾offer，就處於下風，中環地王如果成交價不理想，業主便會立刻接受我們的offer，如果理想，就會將offer退回，我們不會這樣蠢，所以，一定要在地王公布之前簽妥，否則就要將買賣擱置，如果地王做價不理想，我們根本不會出價，一係大家賭一鋪，一係就唔賭，經紀見游說不成，悻悻然離去。

　　昨日，物業代理搵我，主要是話俾我知走寶，業主現在封盤，叫我大膽出價，打動業主芳心，我話，現在業主任何價都不會接受，買家亦不會大幅提價，買賣兩閒局面，將會維持一段長時間，最受打擊的就是物業代理，所以，我唔知點解他們咁開心，不斷發出恒基買地王的訊息，難道他們不知道，將會有一段長時間沒有生意，除非他們最近搵到夠，希望放一個長假期，情況就好似電動車取消稅務優惠之後，加價差不多一個開，那些電動車營業員可以集體放假。

　　幾個月之後，不少物業代理就會怨恨四叔搞到他們沒有生意，其實，地王的售價並不是太貴，相信每一枝標都差不多，四叔只不過是贏了些少，地王與其他甲廈呎價並不能夠雙提並論，地王始終是地王，在六個月之後，業主同買家各自會調整，甲廈成交會慢慢好起來，急也急不來，所以，我認為物業代理應該放大假，無謂強求業主或者買家接受對方價錢，時間是會將雙方分歧磨合，不過，今次時間就要稍為長一些。