地產博客 > 樓市散打王 返回
瀏覽人次:9536    回應:8
樓市散打王
薪金中位數同樓價比較嘅把戲
 
方卓如
2018年1月23日 (信報)

  據調查顯示,香港樓價之貴,上年要18年不吃不喝才可上車,今年已經要19.4年,樓價高處未算高。這個用薪金中位數同樓價比較嘅把戲,只可以用嚟做宣傳,貪soundbite夠響,認真對待你就死得。薪金中位數,你認為一半打工仔嘅人工應該係可以足夠輕鬆供樓?全世界嘅工資都係停滯不前,香港失業率可以創新低係異數,其他發達國家尤其是係年輕人都係冇嘢做。用工資去買大城市嘅樓,唔止係香港,其他大城市已經係趕絕新一代,令佢哋大部分都難以擁有房地產。

  紐西蘭直情想限制外國人買樓,因為本地人買唔起樓,甚至有人要瞓街。用人工嚟買樓,連首富都買唔起,因為佢攞嘅人工超低。大把人唔係靠出糧生活,呢啲能夠買樓當食生菜嘅人,正正係樓市嘅中流砥柱。唔使等下年調查報告,我敢肯定,下年你要21年不吃不喝先買到樓,首次有城市突破20年。

  我早前寫過,香港唔係最難買樓。如果用薪金中位數去計,北京上海更加難,要40年不吃不喝先得。不過調查唔包括內地城市,先讓咗個冠軍寶座俾香港。但係你唔見北京上海樓價跌,政府操控咁厲害,禁買禁賣都出埋,都唔可以令樓市下跌,證明當人類唔相信銀紙,能夠保存財富嘅,最有效永遠係磚頭,中國人思想尤甚。

  你要記住,樓價最難負擔嘅城市,通常係最多人想生活、最搵到錢嘅城市。排名香港之後嘅,有悉尼、矽谷一帶呢類城市。全部係生活一流,或者財富增長最快嘅地方。市場唔會呃人,樓價咁貴,呢啲城市都無話人口遷離,市民大逃亡,反而愈多人想住,愈多人想置業。又唔見大量人口遷往樓價甚平嘅喀布爾?樓價愈貴都咁多人湧入,梗有其原因,後果係樓價會更貴。

  史上出現樓價一沉不起嘅,只有日本,得呢個國家,樓市泡沫爆破後繼續長期沉淪,讓香港人咁多機會走去買樓,變身民宿出租。原因係大部分日本人都係甘於打工,每月出糧。你睇吓日本地鐵站,那種營營役役嘅氣氛,全世界少見。用薪金中位數走去買樓,結果就係年輕人走向極簡主義同無慾無求,反正一世都唔使旨意,不如將自己生活要求降低,咁就生活得寫意。香港千祈唔好望份人工夠你買樓,要先諗如何唔買樓去令你未來可以買樓,等於前輩話齋,望自己發達都唔好望樓價跌。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. Bos fan 2018-01-23 22:10:17
多謝好文章指教
2. 中位居 2018-01-23 23:12:59
好文章,謝謝
3. 已入市的80後 2018-01-23 23:55:41
好文, 不得不轉發. 尤其適合呢度D 淡友睇
4. 搞笑 2018-01-24 00:36:59
傳媒真是搞笑,香港有很多人是靠份糧去買樓?在香港決定你買樓能力的是你或者你父母累積的財富,而不是靠收入。 

這幾年一隻騰訊也為不少人賺咗一桶金作為首期。


5. 引刀一快 2018-01-24 02:15:58
一個只有靠父母資產維持樓價嘅城市,我就唔buy喇,有石油出都死。
6. 同意引刀所講 2018-01-24 02:20:47
大陸樓市主要是靠啃老支持,班後生仔都是靠父母出首期,衰過香港。靠班老野支持,大陸樓絕對不可以buy。大陸年輕人個個都好無恥,以家中有老可啃為榮。文革遺毒,不知孝道!
7. 孟波 2018-01-24 08:44:34
好文,直接道出事實。
8. 好文 2018-01-25 10:41:24
咁多技術性分析, 都唔及呢種簡單大道理一語道破