地產博客 > 樓市散打王 返回
瀏覽人次:8726    回應:9
樓市散打王
落注嗰刻已經贏咗
 
方卓如
2017年11月18日 (信報)

  長沙灣地皮以172億元批出,地王由鴨脷洲轉到長沙灣,但論每呎樓面地價,鴨脷洲22000蚊,都仲貴過長沙灣17000蚊。這幅地王以市場估價上限批出,但發展商眼中,呢幅地皮一投就賺, 非常開心。17000元一呎,建築成本每呎3000元,豪華一點算你4000元,21000元每呎成本,後面嘅匯璽而家都賣緊23000蚊一呎,以現價計呢幅地已經贏咗,未使計將來升幅。

  唔會有一個入標嘅發展商估計未來樓市跌,估佢跌就標都唔會入。即係話,中標嘅呢班發展商,先要肯賺少啲,現價都唔會輸,才願意高價入標。他朝樓價再升,賺得更多就更開心。亦即係話,其他落選嘅發展商,唔係對未來樓價唔太睇好,而係想賺得再厚啲,先會出價唔夠人高。一線單獨入標嘅地產商全部落選,表示未來主要賣樓畀你嘅發展商,都係想從你口袋拿最多錢。咁你話,一手市場主導樓價嘅現實下,樓價有乜理由會跌?

中環中心水位點止50億

  全世界做地產嘅商人都有共通點,就係無寶不落,唔係贏梗嘅唔會落注。落注嗰刻已經贏咗,平民百姓諗都未諗過,以為吹水,但世上就係有啲咁嘅機會,只不過永遠輪唔到你,例如中環中心。坊間雜誌話,中環中心約400億元賣出,留了大概50億元水位畀下手賺。驟眼睇似乎唔錯,但係做傳媒雜誌嘅畢竟係文人,從來未做過生意,莫講話做地產。中環中心點止有50億元水位,識計嘅,嚇死你。

  中環中心頂層早前每呎52000蚊賣咗,低層就賣咗32000蚊,拉勻計,當中環中心每呎值42000蚊,買家接手嘅寫字樓已經值510億元。仲有402個停車位呢?每個500萬元,呢度又20億元。仲有一層商場,同埋個大廈命名權、管理權呢?加加埋埋,買番嚟嘅中環中心,其實接近值550億元。400億元成本,一買已經賺150億元!仲唔係落注嗰刻已經贏咗?你要佩服嘅,係加入到財團嘅買家,有本事坐埋分一杯羹,分享一單必賺嘅大交易。可以同央企一齊買嘢,份份文件要拎去北京批,你估容易?一買就贏係好常見,只係你嘅高度睇唔到。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. WisePirate 2017-11-18 12:49:38

拜托睇清楚公告先至寫評論。

402億係出售75%權益既價錢,換言之,100%權益會值536億。真係唔知幾多人又被誤導。

呢種質素既文章唔應該係信報出現。老編,麻煩下次跟跟眼啦。

2. hhy 2017-11-18 12:50:54
中環中心單刁,點解讀賣方思維呢?
3. 草猛仔 2017-11-18 12:58:24
一楼果位Wise叔父, 75%益既数都係咁计,  方帥无错喎
4. Johnny 2017-11-18 21:43:45
呢d咁低質素既磚家都可以出黎發文誤導群眾,真係香港悲哀
5. 有見地 2017-11-19 08:46:11
方帥見地有料到,不用太介意有些人執著一些小問題而制造出一些問題,最重要的是文章中所指出的啟發,非常值得注意及有參考價值。
6. Alan Pepper 2017-11-19 11:42:06
其實應該冇錯,只係報道有點混淆。402億 係買長江佔中環中心的所有業權。而長江所有業權,係中環中心總面積的75%。而方上面所計的,就係長工所有的部份,沒有計其餘部份。對嗎?
7. 二少 2017-11-20 20:20:38
樓市愈升愈有,普羅市民上車無望,一窩蜂喪搶購居屋!房屋協會新一期資助出售房屋將軍澳翠嶺峰及屯門翠鳴臺今日(20日)截止申請,房協累計至昨日收到逾七萬份申請,以六百二十個單位計算,超額申請最少高達一百一十三倍,創下居屋的歷史新高。有關注團體分析指現時樓市過度熾熱,港府提出白居二及綠置居恒常化的建議,無助解決市民「樓荒」,形成市民個個抱有「買得快好世界」的心態,提醒市民應量力而為,港府亦需要在不影響公屋建屋量下,增加供應應付需求。
8. 香港土著 2017-11-21 11:22:41
550億!哈哈~接近四成水位!

會留四成水位比你走就唔係Victor啦…
9. 向飯民說不 2017-11-21 16:33:30
楼上,要走佬就吾同啦。