地產博客 > 樓市散打王 返回
瀏覽人次:12559    回應:2
樓市散打王

樓市充斥最有及最冇實力者

 

方卓如

2017年10月21日 (信報)

  唔到你唔信邪,30年前10月19日黑色星期一,香港股市下跌420點;30年後嘅同一日,恒指跌552點,成交1165億元,嚇親唔少人。不過,30年前係一日跌一成,今次只係跌2%,其實濕濕碎,離股災水平甚遠,如果跌五六百點就驚驚,你都係唔好炒股票。

  冧市有兩類人最驚,最有實力同最冇實力嘅人。最冇實力嘅人通常問最有實力嘅人借錢,用資產抵押。冧市,資產價格大跌,最冇實力嘅人還唔到錢畀最有實力嘅人,沽咗啲抵押品都收唔番條數,你話係咪佢哋兩類人最怕冧市?反而實力普通嘅人,過去一年得個睇字,佢哋唔知幾想冧市,可以撲出嚟執啲筍嘢。除非打仗,或者中美政府出現重大財金決策錯誤,否則見唔到會出現一蹶不振嘅冧市。

  溫哥華有房屋空置稅,任何房屋半年都冇人住,即收1%空置稅,但其實溫哥華空置率只有0.7%。反而香港空置率3.8%,空置稅就諗都唔使諗。D類同E類嘅大單位,空置率仲高達10%。所以話,香港房屋供應缺乏,好大程度係房屋落入了強者之手,佢哋整體响心有靈犀嘅情況下夾份造市。只要大家實力夠,明白唔好出現人踩人,個個都企硬唔減租,寧願丟空,租金樓價必定托到飛起,齊齊玩資產增值遊戲。

  政府要樓價同租金下跌,其實唔係冇方法,重手抽15%空置稅,保證你今日抽籤嘅中環樓盤好難超購十幾倍。但係政府一定唔會咁做,因為冇一個社會可以捱得住樓市大冧,原因係樓市充斥着最有實力同最冇實力嘅一群。樓市大冧,政府善後要花嘅精神,較樓市大升如何安置市民,高出不知多少倍。還有,而家香港有樓嘅人,其實比計劃買樓嘅人更多。所以,政府幾時都係想穩定樓價多於推低樓價。

  有實力嘅人而家係向外搵緊筍嘢,所以你見到咁多海外樓盤嚟香港賣,因為對比起香港樓價,任何地方嘅房屋都可以包裝為筍盤。但係呢個世界係冇咁大隻蛤乸隨街跳,筍嘢係唔會咁易畀你求其响Facebook見到。有實力嘅人,唔代表唔會買錯。佢哋而家最掙扎嘅係,應該留响度等,還是走出去搏。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 根本 San 2017-10-21 18:44:46
香港空置率低就係人都知,你去任何一個區問問鎖匙租盤賣盤有幾多?而破你空置稅又有幾難?
2. Johnny 2017-10-22 16:12:39
居然有d咁流既专家