地產博客 > 資深會員專欄 返回
瀏覽人次:53809    回應:52
資深會員專欄
緣結.天璣
 
珍惜香港
專業機構投資者
SMIEEE.MSc(ICDE)
http://facebook.com/hongkongtruevalue/
2018年2月9日
唔經唔覺,距離上次出文,都已經有成半年多。話說最近耶倫卸任,一句 I DO FEEL A SENSE OF DISAPPOINTMENT,就搞到全球股場,都塞滿哂 DISAPPOINTMENT,所以呢,女人,真喺唔得罪得嘅!今日港股開市,又跌過千點,响呢個大時代出文,對一個從來唔沾手股票嘅作者嚟講,本來就唔喺咁啱 TIMING,但喺我已經唔想再拖,就算啦!都喺果句,贈有緣人囉!

記得我响上文嘅尾聲,提過話會出個新嘅系列;不過,真喺唔好意思,我想鄭重同大家道歉,因為,我已經改變主意。今日呢篇,將會喺我响資深會員專欄裡面嘅,最後一篇文章。

緣結嘅交代

咁即喺算唔算封筆?我諗我只不過決定唔再响呢個專欄出文啫,冇話過以後唔再寫嘢;但如果我走去其他平台嘅話,又會覺得對唔住網主,所以呢家嘢,都幾難解決,到頭來,可能同封筆冇乜分別。其實呢半年以嚟,我反覆思量,既然越寫越疏,咁究竟仲應唔應該繼續寫?我知道有人經常留意著我嘅文章,甚至等緊我出文,或者佢地只喺得寥寥幾位,但就算只得一位,我都會好難過,好抱歉。所以我一定唔會好似三傻咁,唔知唔覺咁消失。正如我話過,待人處世,一定要有頭有尾,緣結,都要有個交代

最近一次見到網主,已經喺兩個半月前,臨別果陣,佢提到我呢排冇乜寫嘢,我一時間都唔知點回應。其實,早响舊年七月初,我已經回覆過網主,當中隱含去意,或許已經算喺一個交代。不過大家亦唔好誤會,果次回覆提到嘅,極其量只喺一個觸發點,或者一個借口。今日嘅決定,非一言而喻,亦非一日之寒,可以追溯至兩年前嘅一個回應,當時有朋友話我萌生退意,佢的確喺講中咗。

天璣不可洩漏

結緣、緣結,彷彿早有定數。就好似啲手機群組裡面,不時有退群,或被退群事件。但其實,原來响好早期,甚至早到群組成立果陣,就已經可以預見到相關嘅因,因為每個人,都有自己嘅一套理念,而相聚嘅目的亦各有不同,只要細心觀察,就唔難睇得出。不過呢啲嘢,我當然唔會叻唔切咁去同群內任何人透露啦!既然遲早都要嚟,今日我多口一句,唔單止改變唔到個結果,仲分分鐘會搞到提前發生,咁本來唔關我事嘅,家陣反而無辜辜做咗始作俑者,何必呢?所以都喺到發生之後,放下馬後砲就算。所謂,天璣不可洩漏,洩漏天璣者,或會遭天譴,真喺唔到你唔信。

至於响網站出文,全地球都睇到,牽連自然更大。我文章瀏覽人次唔算多,但只要唔知俾邊個睇到,話唔定真喺會改變世界。記得三年半前,我寫咗一系列取名《環球經濟新常態》嘅回應,當中提到「留魚再取熊掌」,就喺我第一次公開透露自己槓桿買債嘅操作。後嚟我更提出警告,話間接通過物業融資嘅手法已經好成熟,甚至可能已經踏入幾何級增長嘅時代。跟手一個月後,金管局就針對企業融資出招,當時我稱之為「金融扭曲第三波」。呢波究竟同我嘅言論有冇關係,真喺難以証實,總之公開寫嘢,都喺要小心啲好。

又正如果件唔講得嘅東東,响《出陣》一文揭盅咗兩個幾禮拜後,我同幾個朋友午聚,當中有人問:鬍鬚曾有乜把砲,可以解決香港嘅房屋問題?呢位朋友似乎唔太明白,人地根本冇話過要解決房屋問題,佢只喺叫你面對現實啫,因為,私樓一定唔會平囉!當時我的確有少少後悔,多年以來,坊間對於樓市辣招,矛頭都喺指向 CY,或者我真喺唔應該咁多事。當社會上各既得利益者,同既失利益者,都同時發現,原來拋出 LAST 最狠果招嘅,竟然唔喺 CY,而喺另有其人,我真喺估計唔到會發生乜事。

香港嘅樓市政策

主宰命運嘅,從來都喺人,正如一間學校,換咗個校長,成個校風可以唔同哂,做過家長嘅都應該聽唔少。如果要我為港府過往十年嘅樓市政策,作個總結,我會話:頭五年政府嘅樓市政策,喺前前特首同前前財爺協力之下嘅產物;而後五年政府嘅樓市政策呢,就喺前特首同前財爺角力之下嘅產物啦!

咁今屆又點?坊間種種對現屆樓市政策嘅期望,單喺响呢個地產網都見唔少,唔喺話乜乜見真章,就喺話會點點對付啲大孖沙之類。我話乜都喺假,既然兩個關鍵人物,夠狠嘅落咗台,食腦嘅又退咗休,留返件妹仔响度揸旗,冇協力,又冇角力,咁你話仲會有乜嘢作為?就好似上調按揭劃線單嘢咁,未諗清諗楚就亂吹,與其搞到滿城風雨之後,發難話乜嘢政策以特首睇法為準,咁當時點解唔認真研究咗先?就睇最近阿茂嘅言論,講咗一大堆廢腑之言,咪又喺果句,唔好亂郁!

其實,响資源短缺同市場優化嘅壓力之下,就算唔喺辣招,都總會有其他對樓市收緊嘅政策推出。問題喺,你用乜嘢理念去推出同執行政策,喺積極,定喺消極?習大大响十九大中指出「房子是用來住不是用來炒」,對香港而言,根本就喺實行咗近十年嘅舊嘢。今日香港樓市,已經冇人夠膽死走去炒價,但可惜總有一堆磚家,一方面怪責政府將樓價上升歸咎於唔存在嘅炒家,但另一方面呢,又以股票式嘅炒價思維去預測樓市喎,真喺幾矛盾。

決定買樓對錯嘅標準

橫觀一眾磚家嘅言論,似乎都喺汪先生最貼地,雖然佢一樣咁重視對樓價預測嘅準確性,但起碼唔會下下為咗捕捉一個轉角而大做文章。記得我响《真正嘅第十個人》裡面強調過,自己一向唔鍾意評論樓價,因為我唔想用樓價升跌呢個理由,去影響人地買唔買樓嘅決定。

後市樓價究竟喺升定喺跌,從來都唔應該作為用以衡量今日買樓決定是否對錯嘅標準。

以上呢一點,比任何樓市評論都更重要,就正如當日,一個弱勢屋苑嘅師奶,買樓自用,跟手樓價跌咗,即時俾啲記者追迫到要鬧啲磚家食 K,後嚟個市升返呢,佢講過嘅嘢,就成為金句。咦?咁佢買樓呢個決定,究竟喺啱?定喺錯?定喺時啱時錯?正正就喺果種,執著於後市樓價預期嘅思維,搞到好多本來有能力嘅人,唔喺為咗等跌上唔切車,就喺為咗炒跌落錯車。

其實,買,定喺唔買,只須要問自己兩個問題,第一:你有冇足夠能力?第二:香港,喺唔喺你嘅「」?

土地供應嘅假象

最近我見阿茂,咬實牙根咁話,「搏晒命」先至令到私樓供應量達標;可能我又要讚下佢「有心、有力、有承擔」囉!不過佢話達標,唔知喺咪指果九萬七?當中又有幾多蚊形單位?不如咁啦,以後講私樓供應,唔好再以「單位」去計,就公佈可以推出幾多「實用面積」啦!不過我量你阿茂都冇咁嘅吉士,容乜易出嚟個數字,真喺會嚇死人!

多年以嚟,市場上各門各派嘅磚家,為「好、淡」呢個議題,拼個你死我活,但佢地都有一個共通點,就喺一致認同,香港嘅土地供應,嚴重不足,呢點我諗大家都應該冇乜異議。最近汪生有篇文章,話要增加香港嘅競爭力,一定要有平嘅土地,要平地,就一定要大幅倍增喎,跟著就講埋一堆,話咁易嘅東東。我諗汪生有一點忽略咗,就喺香港已經喺發展成熟嘅城市,多年規劃之後,好多嘢,唔喺你話郁就郁得,亦唔喺容唔容得下嘅問題。仲有,競爭力,同平地,有乜關係?世上數一數二嘅國際級大都會,啲樓同地都喺好貴,除非你香港,變返做漁港啦!你喺咪真喺想咁先?

大家唔好誤會,我冇話要政府刻意搞到啲樓好貴,只喺有啲嘢,勉強冇幸福。其實只要繼續「有心、有力、有承擔」咁去增加供應,已經好夠,無謂再費時失事去搞埋啲乜嘢大動作,倒不如諗下,點樣再強化香港既有嘅優勢算啦!話說某團隊提出一個食得起 35 萬人嘅「藍塘」填海大 PROJECT,仲交咗俾人多好辦事嘅土地供應專責小組考慮考慮添。其實,任何要二、三十年先至見曙光嘅土地供應大計,真喺可以話搞又得,唔搞又得。

因為,無論你點搞,長遠而言,香港唔會再有土地問題。

困獸鬥思維

吓?香港唔會再有土地問題?好彩我只喺個繁體字人啫,而呢篇又喺告別篇,咁就算得罪哂所有磚家,都應該唔會死得太慘嘅。我想講嘅喺,各位磚家,各位香港人,我地都回歸咗祖國超過廿年,唔好再喺咁抄新加坡啦!香港,只喺一個城市,成個國家咁大,一個城市,又點會有土地問題?點解大家仲要死守著一個,困獸鬥思維?

近年內地經歷連串打貪,國家發展嘅最後阻力,幾乎已經被清除哂。十九大期間提到果一南一北,即喺粵港澳大灣區,以及京津冀,兩大世界級城市群嘅建立,勢在必行。話說幾個月前,林鄭提到大灣區規劃三大重點,當中嘅互聯互通,即喺「人流、物流、資金流、資訊流」嘅全面自由流通,呢家嘢,當然唔喺妹仔嘅 IDEA,廣東省長早响大半年前都已經強調過,根本就喺由上而下,促進中港融合嘅重要國策。所以,唔單止我地香港人,國家都喺盯著個 2047,大灣區要見真章,將會喺呢二、三十年之內嘅事,不過我話嘅「見真章」,唔喺啲磚家講果種!

試諗下到時,從大灣各城市過嚟香港,都只喺個幾鐘嘅話,咁香港仲會有土地問題咩?最近有網友狂 SELL 大灣區,仲忍唔住出咗篇《號外》添。睇返之前啲回應,見有部份人似乎幾抗拒呢位網友咁 HARD SELL,不過佢講嘅嘢,唔喺全無道理,希望各位對事唔好對人。香港真喺冇必要棄質取量,搞到要郁郊野公園或高爾夫球場之類,至於填海造地,應該以經濟發展為目標,而唔喺要將香港變成一個集中營。大灣區的確有好大發展潛力,就好似以前未發展嘅新界咁。但講到買樓投資,成個灣區咁大,邊處跑出喺冇保證,所以都喺同一個問題,你嘅「」會响邊度?如果你冇諗著搬入去,而只喺純為投資,隔山打牛嘅話,咁最好都喺諗清楚先。

港樓又點?仲有冇投資價值?有人話冇,仲攞海航出嚟,笑人地買到破產。我上次都話過,呢個世界,已經唔同哂,唔信?咁你咪買定花生,睇下點囉!講真,如果你睇淡咗咁多年,都唔兌現,就應該要檢討一下自己,而唔喺求其見到件似淡非淡嘅因素,就好似拾到金咁,就算今日俾你睇中咗,又有幾叻?都喺果句,心,可以死,但喺,千祈唔好成魔!關於港樓呢個問題,其實好簡單,大家可以追溯至香港剛剛發展新界新市鎮嘅年代,市區唔夠地,自然要發展新界,咁唔通市區嘅物業,就唔再有投資價值?非也!只喺,更有價值!而大前提喺,中環,仲喺唔喺中環?市區,仲喺唔喺市區?

成敗在於規劃

即喺話,只要香港保持國際金融中心嘅地位,呢處永遠喺大灣區嘅中環,港樓永遠有投資價值。國際金融中心本身,已經喺對本土各行各業最大嘅支援,上至金融地產,下至零售甚至到街市買餸,無不受惠於呢個重要地位。你千斤撥四兩走去搞創科產業,都唔會贏得到深圳,真喺無謂嘥力。所以點解要大搞河套區,就喺想將深圳嘅創科產業南移,反過嚟支撐著香港呢個金融中心,呢招咁高明,唔知喺邊個度出嚟?總之唔喺妹仔,亦唔喺 CY。

所以要贏,一定要由最原始嘅規劃入手,當紐約被奠定成為美國嘅金融中心之後,就好難改變,所以妹仔真喺要醒定啲,唔好淨喺掛著點樣俾港人去大灣養老呢啲師奶嘢,因為,國際金融中心呢個地位,亦唔喺冇變數嘅。將來唔知幾多年後,人民幣國際化,到時以港元為基礎嘅資產,包括成個香港股市,都真喺幾尷尬。加上深圳已經建立咗一個以人民幣為基礎嘅 A 股金融市場,玩下手香港做唔成中環,仲反而變咗做深圳嘅新界,到時就真喺大大鑊。

咁我地應該點做?唔通學過氣沙皇話齋,一味做大,大到一個「不可或缺」嘅規模?總之唔理乜叉,人有我地都要有,就好似「同股不同權」咁?

同股不同權

2014 年,阿里巴巴棄港投美,話說理由喺,港交所唔肯特別優待佢同股不同權嘅要求。結果引發多年討論,話香港金融監管太嚴啦、食古不化啦、追唔上創新經濟潮流啦,之類之類,搞到唔見咗舊肥豬肉。最近港交所終於肯開綠燈,林鄭梗喺將呢個好消息,第一時間通知馬雲,仲請佢返嚟上市添。見到堂堂特首,卑躬屈膝,身為香港人,簡直冇眼睇,我話妹仔好易俾人呃,果然喺冇講錯。

不過又唔怪得哂妹仔嘅,成個金融業界,咪又喺一樣!真喺唔好話我寸,睇死馬雲,就算當年俾佢同股不同權,最後咪一樣走去美國上市,只喺個藉口冇咁靚仔啫!當然,呢下冇人可以證實,我點講都得,咁不如睇下果隻中環摩天輪,話說價低者得喺有公開諮詢喎;講真,你隨便問個路人甲,都話收廿蚊好過一百啦!到真喺收你廿蚊呢?又話想再平啲,再唔喺就轉多幾圈,家陣邊有人話俾唔起?消費者從來都喺咁 CHEAP。中標果件收得你廿蚊,擺明要斬到隻開荒牛一頸血,同呢種人做生意,真喺後患無窮。難怪盛智文話,呢單喺佢經歷中最難嘅談判啦!唔喺呢位大好人最後唔知應承咗啲乜,人地真喺唔玩到你香港俾全世界笑死,都吞唔落呢啖氣。當年招標果陣,唔知邊個「有心、有力、有承擔」嘅發展局長咁鬼冇腦?不如今年財政預算案,先諮詢下公眾派唔派錢:唔派?每人派一萬?定喺十萬?

所以話,呢個世界,喺充滿假象。好多人將同股不同權,跟創科公司掛勾,講到好似唔搞好呢件嘢,就乜叉創科企都唔可以嚟香港上市咁。咦?當今港股王騰訊,又使唔使同股不同權?人地騰訊,無論响產品同併購方面,都喺以質取量;至於果間網上巨型雜貨攤,棄港投美,根本就同佢棄質取量嘅作風,完全吻合,講乜同股不同權?其實,叫得做創辦人嘅,最初都喺最大股東,賣走九成股份,CAP 足水袋袋平安,但又要話返哂事喎,呢啲公司喺乜料,真喺唔使多講。所以我都喺 BUY DAVID WEBB 同 PAUL SMITH 兩位果套多啲,人地重視嘅,喺上市公司嘅質素,唔喺要一大堆唔知乜水。

就睇堪稱史上最強嘅 IPO 沙特阿美,唔知最終會响香港,倫敦,定喺紐約上市?你香港又會點 SELL 人地?其實世界上,就只喺得一個國際金融中心,真正可以集合到全球任何一個地方嘅資金,呢處就喺香港。咁其他金融中心呢?都怕得嘅,除咗中國囉!香港响基礎上喺有絕對優勢,李小加亦心知肚明,唔通 SELL 人地同股不同權咩!

債市 RULES OF THUMB

近期 USD/HKD 都喺徘徊响 7.8 以上嘅高位,我諗如果沙特阿美真喺嚟香港上市嘅話,分分鐘會跌返去強方兌換價,搞到金管局又要出手啦!所以呢,唔好話我成日寸啲傳統主流經濟學嘅信徒,成日死守著一啲 RULES OF THUMB,懶理果啲 RULES 嘅背後,原來仲有一大堆 ASSUMPTIONS。美國加息,唔一定會令到資金大量流走,因為息差,只喺其中一個因素,真正要睇嘅,喺當地嘅投資環境

上星期三,有朋友問我點睇美國議息,我嘅反應喺:乜今晚議息咩?一個手持大量美元債嘅專業機構投資者,竟然唔知道美國幾時議息,真喺講都冇人信。記得《真正嘅第十個人》揭盅前一刻,我出咗個回應,話無論最後嘅結果,喺加,定喺唔加,我都已經贏咗,仲話揭盅之後,唔會再提添。不過後嚟,我都忍唔住出多一大篇回應去詳細解釋,諗著點醒啲傳統主流經濟學派嘅信徒,結果,當然喺點極都唔明。

如我所料,之後幾年,債市無懼加息,仲越加越火,佢地成日掛著果堆黑天鵝,半隻都冇出現過。由金融海嘯,債券人見人怕,到今時今日,連甘比都要大手搶貨,搞到我地呢啲細 PI,想食一張都難。債券需求不斷上升,而債價升過之後,跟著就緩緩向下。咦?乜唔喺需求越大,價越貴咩?點解條 RULE OF THUMB 唔 WORK 嘅?哦!一定喺另一條 RULE OF THUMB 啦:加息,債跌囉!又錯!原來債券,喺有年期嘅,啲高息債升得幾火,到期都一樣要跌返去 100,但因為需求大咗,新債唔憂賣,又使乜發咁高息?所以承接嘅新債,就自然升唔返舊債咁高,令到整體債價向下,至於美國多次加息,响當中扮演嘅角色呢?喺近乎零!

環球金融嘅缺口

美國佬响環球金融嘅舞台上,已經喪失咗領導地位」,呢個先至喺《真正嘅第十個人》嘅結論,果次喺我最後一次關心美國議息。我話我贏,喺因為已經確認咗呢個重要訊息,以致往後幾年嘅投資,剔除咗加息呢個考慮,從而作出正確嘅決定,所以點解我話,千祈唔好執著一個答案

特佬上場之後,美國優先嘅各項政策,正喺加速削弱緊美國,以致美元响國際間嘅影響力。而美元作為國際貨幣呢個地位,亦會開始動搖,令到環球金融及貨幣市場,出現一個缺口。呢個缺口,可以嚟得好快,但人民幣國際化嘅進程,又未必能夠趕得上。响天時地利之下,似乎出現咗一個,彷彿為香港度身訂造嘅機會。我諗,如果香港抓得住呢個機會嘅話,上面提過嘅,關於能否保住國際金融中心呢個變數,將會消失。呢個就喺我《政經》文中自嘲嘅,所謂「痴人說夢」。

咁具體上應該點做?唔好問我,我唔喺呢方面嘅專家,只能夠從宏觀方面去睇。資金從來都只會流向投資環境最好嘅地方,邊個加息,都唔會擋得住,就算得,都只會喺一時三刻。所以,要提升港元嘅國際地位,就要優化港元資產,以及作多元化發展,除咗吸引國內外優質巨企到香港上市之外,更要提供發行港元債券嘅誘因,並提升至能夠引入到亞投行、一帶一路等國家級嘅融資。話說政府推動港債多年,最近先至有少許成績,港債嘅投資價值,亦開始受到認同。不過,就睇三跑,仲喺以美債為主,只有唔夠一百億喺港元債。

都喺果句,要做大至「不可或缺」嘅規模,一定要以質取量,而唔喺棄質取量

天璣.天機

寫到呢度,好似講咗好多好多嘢咁,開始有啲累,今次唔知會唔會,破哂我寫得最長嘅紀錄?雖然只喺告別篇,但我寫嘢,從來唔會敷衍大家。涵蓋咗一系列議題,彷彿有如蜻蜒點水,其實都喺圍繞著一個主題,就喺「天璣」。呢個世界,喺充滿假象,同無數謬誤。要洞悉天璣,唔喺靠啲乜嘢 RULES OF THUMB,而喺要用心體會,從最基礎方面去了解。點解我可以憑兩段畫面,就睇穿沙皇乜料?皆因我曾經被朋友邀請,出席一個上市公司嘅酒會,經歷過周圍三唔識七,唔知點樣交際嘅處境。

不如又睇下另一單嘢,大家應該仲記得林子健事件,你估當中最精彩嘅,喺邊一幕?原來就喺何某仁果一段說話,尤其喺呢一節;其實何某呢份人,真喺好聰明,答案簡直呼之欲出,但可惜,佢就喺差果少少。正因為差果少少,就搞到俾人笑做 AV 仁。唔單止喺佢,上次我寸卿姐離哂地,今次再睇埋李大狀推薦乜水,就已經能夠斷定,成個禽流黨,可以收皮。共事多年,都睇唔清對方喺乜嘢本質,如果中共領導層,喺咁樣去搵接班人嘅話,我諗真喺要喳喳林沽哂手頭上啲內企債啦!

所以話,要洞悉天璣,一啲都唔難。咦?咪住!乜唔喺「天機」咩?如果你以為我寫錯字嘅話,咁你就中伏啦!一個人類,又點能夠洞悉天機?我見到嘅「天璣」,其實只喺一顆星。响適當嘅天時地利之下,即喺春夏之間入夜之後,仰望北方繁星,會見到大熊座著名嘅北斗七星,當中排行第三嘅,就喺天璣。天璣,從來都喺掛响天球上同一位置,冇離開過,任何人都可以搵得到。問題喺,你會唔會好似何某仁咁,就喺差果少少,睇錯隔離?

感因.感恩

講到錯字,我又記起上文《結緣》發表當日,有朋友第一時間同我講,話文中「因果錯配」果段裡面,有一隻錯字,應該喺「感恩」而唔喺「感因」。其實我真喺冇寫錯,的確喺「感因」。我話,好多矛盾,都喺源自因果錯配,要化解因果錯配,只有一個辦法,就喺「感因」。

咁點解唔喺「感恩」呢?我想問大家一個問題,點解我地要愛國?喺因為自由行?因為東江水?因為一國兩制?因為國家對我地有「恩」?非也!好多中港官員,成日話國家對香港點好點好,所以香港人要愛國,但你講果啲「恩」,人地根本唔 BUY,仲反過嚟咬你,話自由行搶哂啲資源,東江水呃錢之類。凡事,都有兩面嘛!呢啲爭拗,只會沒完沒了,何必搞到咁複雜?

愛國,因為我地喺中國人,就喺咁簡單;國家,喺我地嘅因,就喺咁簡單。

正如孝順父母一樣,唔好講話父母對我地幾好幾好,冇佢地,我地連存在嘅機會都冇。好多香港年青一代,父母或祖父母都喺嚟自內地,但就以香港人自居,否定自己喺中國人。其實,英國人嘅統治,只喺好似過客咁,香港嘅年青人,今日嘅幸福同自由,都喺由國家嘅苦難換返嚟,你地又回饋返國家啲乜嘢?仲要反過嚟,指令國家 GRANT 你呢樣果樣?如果香港人,懂得感因嘅話,中港矛盾,就唔會存在。

一個感動嘅答案

寫到呢度,差唔多要告別啦!

曾經有幾位朋友、網友,都話過我寫啲嘢好深,或者好玄。雖然唔喺經常出文,但我對每一篇文章,以及當中涉及嘅人同事,都真喺付出咗幾多,所以各位要睇得明嘅話,起碼要付出返少少。每次出文之後,我都覺得幾累,或者真喺太累。我曾經响某群組裡面,透露過或會出告別篇;有朋友希望我繼續寫,我問,你地真喺咁想我寫?其實,如果有人真喺咁渴望我寫嘅話,我又點會忍心唔寫?

當年為咗三傻回歸,我寫咗一篇《》,結果令地產論壇,轉化成今日嘅資深會員專欄,之後我話寫又話唔寫,都喺為咗佢地。我莫大嘅誠意,都無法令三傻動容,當中亦只有一位肯俾啲反應。講真,如果我喺三傻之一,有人可以為我咁去付出,呢個人以後就算寫乜嘢垃圾,我都會回饋幾句。不過大家唔好誤會,我唔喺要苛求呢種程度嘅誠意,我唔喺啲乜嘢財演、磚演、或者債演之類,唔喺要追求啲乜嘢名、利,亦唔喺要追求啲乜嘢粉絲、讀者。由寫回應,到寫長文,到寫專欄,响呢個網站,經歷咗近四年半;有時我會問,寫咁多嘢,究竟為乜?今日,就連我自己,都答唔出。

如果有人俾到一個答案,可以令我感動嘅話,或許我會考慮改變今日嘅決定。

告別之感因

告別資深會員專欄,當然要感謝一啲人,首先喺網主同湯博士。兩位都喺專欄嘅因,冇佢地,就冇專欄,所以我必須感因。但要強調嘅,喺感因,而唔喺感恩,佢地對我冇恩,但喺有因,兩者之別,早幾段之前已經解釋過。記得我响兩年半前嘅一篇回應裡面話,我唔喺乜嘢粉絲、讀者,我只當博士喺朋友;跟著半年後,我亦响另一篇回應度提到,網主喺我朋友,唔喺乜嘢前輩。朋友之間,要互相尊重,所以有啲嘢,喺唔可以亂咁嚟嘅。

話說上文《結緣》打咗個一男一女嘅比喻,今次我想改改個故事:如果男方純粹只喺以普通朋友嘅身份,約女方見面,但之後個女仔,竟然開大喇叭公開話人地追佢,咁你估會發生乜事?我諗以後,個男仔老遠見到佢,就算冇鞋都要挽屐走,唔喺容乜易俾佢影埋相,話你跟蹤佢?個女仔咁做,其實同絕交冇分別。所以呢,待人處世,除咗唔可以冇頭冇尾之外,其實仲有好多嘢,都喺唔講得笑。

繼網主、湯博士之後,我要感謝嘅,仲有三傻。資深會員專欄,喺為咗佢地先至會出現,所以三傻喺好關鍵嘅因。不過,大家朋友一場,如果有嘢要回覆網友嘅話,就請自己動手,唔好再要我代筆啦!其實我對朋友,都算喺咁。大半年前一個聚會裡面,有朋友話我早著先機,皆因債市已經變得好難投資,但佢似乎唔記得咗,早响三年幾前同佢初次見面果陣,我就已經透露過自己果三個十倍,喺點樣操作。

我呢份人,唔太鍾意晒嘢,亦好介意洩露自己嘅私隱,所以分享還分享,我喺唔會提供任何証明,信不信由你。記得曾經為咗幫一位朋友,令佢唔覺意從銀行收到關於我投資規模嘅一啲傳聞。其實,我有幾多萬、幾多千萬、甚至幾多億,都唔重要,朋友之間,唔喺在乎呢啲,亦唔喺在乎有冇乜嘢金錢、合作關係,或者相關嘅預期,總之,朋友,就喺朋友啦!

所以最後,我當然要感謝一眾朋友,同一眾網友。同樣地,網上交流,喺雙向;雖然我有時都幾寸,令部份網友或會覺得我寫到好似指導對方咁,但請各位記住,我地之間嘅身份,從來都喺對等。所以,你地喺朋友,喺網友,唔喺粉絲,唔喺讀者。

緣結皆因惜緣

已經寫到尾聲啦,真喺有啲唔捨得。記得三年幾前,我寫過一篇題為《惜緣》嘅回應。我想同果位朋友講,其實當時,我唔喺唔明白,只喺仲未肯放低啫。

緣結,皆因惜緣。

網主、湯博士、三傻、各位朋友、各位網友,由《》至今,已經有兩年半多,我諗我已經俾咗大家足夠嘅時間。Natalie Cole 嘅 Someone That I Used To Love,我都分享過好幾次,做人真喺唔應該咁拖泥帶水。I wonder if someday I'be good with goodbyes,今日,我要告別資深會員專欄啦!

2015-06-20 序
2015-08-07 真正嘅第十個人
2015-12-11 十四篇後感
2015-12-31 專業機構投資者(一)所謂專業
2016-01-18 專業機構投資者(二)市場嘅角色
2016-03-07 專業機構投資者(三)致亞視員工的信
2016-06-26 專業機構投資者(四)明燈.答案
2016-11-06 專業機構投資者(五)加辣.磚家
2016-12-05 專業機構投資者(六)歸邊
2016-12-24 專業機構投資者(七)遺憾
2017-01-21 專業機構投資者(八)出陣
2017-02-14 專業機構投資者(九)政經
2017-03-28 專業機構投資者(十)陣痛
2017-06-29 專業機構投資者(完)結緣

遺憾》之後,我告別咗回應箱,今日又告別埋個專欄,睇嚟真喺要講再見。不過我呢份人,唔鍾意咁絕情,所以我會保留今日呢篇文章嘅回應箱,不時過嚟睇睇。各位想搵我嘅,或者有任何問題,可以响度留個言,我會盡量回覆。將來有任何動態,例如唔知去邊處再寫嘢嘅話,我會預先响呢度通知大家。

啊!差啲唔記得,上面我好似話,或會改變今日嘅決定。不過要人地俾一個,連我自己都答唔出嘅答案,呢個條件似乎太苛刻。或者咁啦,我講過,自己對每一篇文章,以及當中涉及嘅人同事,都付出咗好多,咁究竟喺付出咗啲乜嘢?我諗,如果有任何一位註冊回應者,答啱嘅話,應該足以令我感動。

各位再見!

Natalie Cole:Someone That I Used To Love ..... (and more)
 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 長期讀者 2018-02-09 14:14:46
等到頸都長,今天終於看到珍惜香港文章,可惜已是最後一篇。

感恩,祝珍惜香港心想事成,身體健康,有機會再和大家分享。
2. littlemun 2018-02-09 15:07:27
多謝你, 真港兄! 每次看你的交章就如交心一樣...
3. 厲害 2018-02-09 15:08:24
請繼續發表,讓更多人知道真相;

繼續的理由很簡單,不能讓某些磚家繼續誤導他人。
4. 喜歡閲讀 2018-02-09 15:53:37
我冇註冊但係都想試一試回答。

:真誠對待朋友嘅心意

有緣讀得筆者嘅分享,感激。
5. 孟波 2018-02-09 17:40:04
我唔係註冊者不過好認真細讀真港兄文章,內容超有料到和有見地,惟一瑕疵係(坊)間個坊字錯了。
6. MMC 2018-02-09 19:12:30
珍兄,未睇內文但很高興能再欣賞你的大作。
7. 二少 2018-02-09 19:50:03
有緣咪再寫,無話為邊個嘅!唔應該有思想制肘.
8. 引刀一快 2018-02-09 20:32:18
珍港兄

成個灣區咁大,邊處跑出喺冇保證,所以都喺同一個問題,你嘅「」會响邊度?如果你冇諗著搬入去,而只喺純為投資,隔山打牛嘅話,咁最好都喺諗清楚先。

問得好,答答先:

1,大灣區呢個已經唔係概念,甚至唔係規劃,而係政策。所謂“跑出”,絕對唔會係一兩個小地方,只不過係唔同地方有唔同發展而已,要改善生活的話,只要交通方便、不閒雜、發展成熟,都係好地方,要投資的話,當然要留意政府動態,呢點唔使多講。講到“保證”,保證大灣區同香港會越來越近,保證大灣區交通會越來越發達,保證大灣區越來越好住,呢D係對未來生活以及人生嘅投資。不過,如果要“保證賺幾多”,做定期收息就可以了。

2,家喺邊度?點解要拘泥於一個家?點解過咗關之後就唔可以係家?輕輕鬆鬆買一間寬敞舒適嘅屋,無論你當唔當係家,都一定可以彌補香港D細屋所欠缺嘅部分,相比於港樓嘅價格,投資細效果大,早就大把人做緊,我喺呢度呼籲,對象只係未諗通果班啫。

我開始講香港珠三角融合嘅時候,大灣區都未公告。
9. B爸 2018-02-09 20:39:00
《橫觀一眾磚家嘅言論,似乎都喺汪先生最貼地,雖然佢一樣咁重視對樓價預測嘅準確性,但起碼唔會下下為咗捕捉一個轉角而大做文章。》

超同意! 嘩衆取寵, 留言質疑佢預測唔準就刪人留言, 真是暗人說暗話, 樓市論壇之卑!
10. Sugar 2018-02-09 21:09:34
珍兄:

在下絕不贊成你"封筆" 之決定,但拙嘴笨舌不知如何才能說服你回心轉意。剛見到8樓引刀兄的留言,這下可好了:其言溫柔懇切(一改頂心頂肺之風)......見之哪怕你再鐵石心腸也該有些動容了吧?!^^
11. B爸 2018-02-09 21:21:53
繼續追蹤珍港, 珍重
12. MMC 2018-02-09 21:57:01
珍兄,終於看完了,很可惜!我未能給你一個令你感動的理由不封筆,但你每一篇專文也令我很感動!

謝謝!
13. 小明 2018-02-09 23:05:41
長文未細閱,先說聲多謝。珍港兄的大作確令人期待。覺得可惜但尊重你的決定。
14. 可惜 2018-02-09 23:14:38
謝謝!自成文章,就有回響,可否就係原因?
珍重
15. 費青舊友 2018-02-09 23:24:47
感謝,再見。
16. 惜緣 2018-02-09 23:53:48
珍港兄

任何說話亦表達不了我今天感慨萬千的心情,一切盡在不言中……
17. Hk 2018-02-10 03:21:23
看文章快4年了。(只有發言二次!)
或許該更清楚的說,看大家的論壇4 年了。
我長期不在香港,透過各位的討論,給予我更多對「家」的了解。

所以,在這裏要特別對所有留言的朋友說句:謝謝你。(如珍兄說的:對版主,及博士等也是要好好「感因」)

一般主筆或許跟平民百姓太離地了,他們的看法有時候並不合乎小讀者的狀況。對打工的人,把第一桶金拿來買磚頭,實在有很大的壓力。

論壇上能夠看到多元的看法,增加了我「回家」首購的勇氣。(富人資源豐富,大概也不太會浪費很多時間來看文章。有句俗話:錢是膽,有錢就能任意妄為,反正口袋深!)

希望
珍兄  能夠休而不退,給小讀者多些鼓勵!
再一次謝謝你,寫一篇長文實在很辛苦!
18. 樓市初哥 2018-02-10 09:12:00
初次拜讀,給了我很多啟發,令我更清楚路向。
香港是我家?這問題以前很容易答,但發生近年的事和有了小朋友後,心裏沒有肯定的答案。我想你道出問題所在,如果我們真愛這個家,能力又容許,就没有所謂的高追。
你可能不知道,你的文章有機會改變其它人的一生。當然決定和後果自己付責,但你多角度分析能给我們初哥較全面的見解,洞悉"天璣"。萬分感謝
19. 大喊十 2018-02-10 11:46:21
睇珍港兄文章,睇完唔識投资,都應該學識追女仔,珍重。

20. 元朗人 2018-02-10 12:05:35
每人今天仍活著,好應為人類發展貢獻一分力,知識或其他生命體驗與人分享也是貢獻。評論出自真誠,無分對錯。最後想為這論壇鼓掌鼓勵。
21. 習慣 2018-02-10 12:15:58
我將這個地產論壇設在上網的Favorites bar上,每日必睇,沒時間睇也會按日期睇返未睇的文章。

如是者,這個習慣已經幾年,出回應只是一次咁多。

我沒有本錢或本事去仿傚甚麼投資策略,但是眼界擴闊是維持這個習慣的主因。

香港需要高質素多元化多角度,這個論壇也一樣,一言堂的還有甚麼好看?

今次出回應就是不想筆者封筆或退隱,這是理由嗎?
22. 地藏 2018-02-10 14:01:51

究竟為乜?

執為而為,為己也。無為而為,為眾也。

請珍港兄三思!

23. 引刀一快 2018-02-10 15:32:47
Sugar 姐

乜你嫌呢兩段嘢唔夠頂心頂肺咩?哈哈哈

其實我從來冇刻意去主動頂心頂肺架,有果句咪講果句囉。
24. 凝風 2018-02-10 16:01:24
珍港兄~ 謝謝你一直以來分享~

"你千斤撥四兩走去搞創科產業,都唔會贏得到深圳,真喺無謂嘥力。"
話說3年前我在上海看某企業發佈會,到上年我在國內工作留了2個多月,其中一部份就是跟IT團隊工作,成個團隊基層大部份人的工資大約5-6千人民幣(主管當然不是這個數)。我權限睇到,創科成本低得恐怖~
2017年有很深深體會到,成個團隊output既野,咩叫"無中生有"!
中國人太利害,我大膽說一句:"創科!香港在井底!"

我不會像官媒說:別讓XXX跑了~
我反而說:去高飛吧!去找你的一片天~
"心態"每人都不一樣~
留言......是有壓力的~

衷心祝福你,一帆風順~身體健康~

我深信的緣~
相約而不相遇,相遇而不相約,總會再見!
25. 打工仔 Andy 2018-02-10 16:41:07
珍兄

緣, 三年多前在這裡認識了珍兄及一眾網友, 後來更成為好朋友,
小弟由網站讀者變成什麼資深會員, 又由每日必睇變成得閒先睇, 

今天回想的確感慨良多! 有好多事情大家心照, 
長話短說一切隨緣, 新春將至, 
祝大家狗年事事如意, 生財有道 ! 

26. 偉雄 2018-02-10 19:30:45
今時今日論壇氣氛充滿負能量,都走得七七八八啦!唔走都好少留言,珍兄都算係咁喇!對博士同綱主隨咗感因,實在說不出感恩,一個階段的結束,正係另一個階段的開始,祝順順順。
27. 珍惜香港 2018-02-11 05:24:17
珍惜香港

錯字已經修正,謝謝 5/F 孟波指正。

關於 8/F 引刀兄的回答,我是認同的,不過還是那句,不要太 HARD SELL 吧,哈哈!

至於 16/F 惜緣兄,我之所以在文中提到了你,是因為聯想起你當日的決定,而今次出文之後發生的事情,更令我感慨萬千。

緣結.天璣》發表後,當晚有一位朋友 WHATSAPP 我,他對文中部份內容感到非常不滿,並希望我修改。但原來,他是收到另一位朋友一張圖片,圖中顯示了文中只有幾十字的部份。我說,大家朋友一場,你不喜歡的話,我是不介意修改的;其實我還未寫完,他就已經回了一句「唔該」。接著我就說,這已經是告別篇了,你對這告別篇,就只有這些?他說,暫時未詳看。於是我話,不介意修改,同會修改是兩回事啊!之後發生什麼事情,我不寫了,總之這個人,已經不再是我的朋友,就算連相識也談不上。

有一點,我想對我朋友,以及前朋友,鄭重聲明,無論(你認為)你有幾大道理,亦無論(你認為)你有幾對,或者(你認為)我有幾錯,沒有看過我文章的話,是沒有資格對我提出這種要求的。

不過我相信,就算這位前朋友,之後再回看我的文章,分別亦不會太大。正如一隻井底蛙,認定牠看到的那一小個部份,就是天空的全部,就算牠最終跳出了那口井,亦只會用牠認定的那一小個部份,去演繹整個天空。

失去了一位(或許是一班)朋友,的確有些可惜,但朋友不是在乎量的。我 PARTNER 話,不要再亂交朋友了!他真是欠打!但有一點是慶幸的,人生之中,好多決定,都不是可以隨便話做就做,就如手機群組的某些掣,亦不是可以隨便按的。勢利的人,有很多種,如果有人,為了些片面的事情,就主觀地認定自己的利益受到損害,亳不猶豫地按下了一個不能隨便按的掣,這種人,是非常危險的。我慶幸的是,沒有和這種人,建立進一步合作或金錢關係。因為人與人之間,意見不合在所難免,今日雖共飲共醉,但他朝面對重大利益的時候,可能真是死了也不知道為了什麼。

其實不單是這一篇,我以前寫過的文章,都有談及身邊的人,或者朋友。真實的人和事,就算是微不足道,都可以觸發對宏觀世界的了解。我對文章裡面,提及到的所有朋友,不論是讚美、批評、贈言、埋怨、或者是比較之類,都是至真至誠的表達。對方就算不同意,但作為朋友,我會假設他們有足夠量度,理解我的誠意,如此雙方就會有所得著。但若視之為抽水,只代表你自視過高,莫說是做我的朋友,就連相識的資格也沒有。關於提及朋友,《歸邊》一文應該最有代表性,一開始就已經申明是為幾個朋友寫的。當中有一位朋友,是知名的富豪級工業家,以他的級數,我可以對其寫出贈言,這又可說成是抽他水吧?如果有人認為我抽水,最好還是先衡量一下自己是什麼料子;我要抽水,會選擇那位工業家,還是會選你?

可能會有人以為,寫專欄很了不起。其實在我而言,寫專欄和寫回應,沒有多大分別,反正以前我亦寫過很長的回應,心態和寫專欄一樣。如果要說分別,或許是在於回應是回覆特定的人,專欄是寫給所有人吧。但這個定義在實際運作上是很糢糊的,因為回應不同私信,那是公開發言,全地球都看到。我和其他網友,都有不時借回應表達自己的理念、想法和理論,而這些訊息,會影響到這個世界上,你認識以及不認識的人。這些影響,其實和專欄的都是一樣,觸及到被回應者以外的人,只不過是姿態不同而已。久而久之,我們會和他們建立了一些關係,這是感情關係,並不是普通的關係。我們不能把網友,尤其是那些不認識的,視為一堆文字,呼之則來,揮之則去。因為他們是有血有肉的人,每一個背後,都有著不同的故事,而對我們也是有感情的。

還有,我要強調,資深會員專欄,不是我的專欄,這並非因為它是一個共用專欄。它的創立,是來自一篇《》,而在《》一文中,我是這樣寫的:

今日,我以最大嘅誠意,通過昵一篇「序」,邀請三傻回歸地產網,以地產論壇為出文嘅主要平台。而我亦希望網主,釋出誠意,將地產論壇既發文,提升至地產博客專欄顯示模式,為三傻,以及將來提升成為高級會員嘅網友,提供一個與其他專欄作者,對等嘅平台發文。他日,若成功令三傻回歸嘅話,咁我今日嘅文章,就喺呢個新專欄嘅「序」。我要申明,三傻、網主、各位網友及專欄作者,同我冇任何利益關係或衝突,甚至連私人關係都冇,極其量,只能算喺泛泛之交。呢篇「序」,喺我自發寫,唔喺基於任何人嘅要求,亦冇其他目的,純粹喺盡一個朋友嘅責任,希望大家,開開心心。不過,如果三傻,最終都喺拒絕回歸地產網嘅話,咁我呢篇「序」,就會成為我响地產論壇度,發表嘅最後一篇文章。

於是網主就把論壇,變身做一個專欄,成就了今天的資深會員專欄。所以這個專欄,本來就是屬於三傻的,並不是我的。如果網主沒有刪除或更改過他們的帳號,那麼直到今天,三傻之中任何一位,隨時都可以登入發文。而我自己,根本就沒有想過會在這個專欄出文,把《真正嘅第十個人》定義為一個「召集」,就是不希望再有例外。後來經網主、湯博士及另一班朋友誠意推動,我才改變了主意。第一篇《十四篇後感》的後段,我是這樣寫的:

當一個人,回望自己嘅過去,再重新一次,面對自己嘅過去,為之作出人生嘅總結,喺至真,亦喺至誠。呢十四篇文章,就喺至真、至誠嘅演譯。自「序」以來,今日,終於功成,所以,我會將「序嘅承諾」解封。

三傻應該清楚明白,是他們自己選擇不在這裡發文;或許離開的時間太久,他們忘記了,而我就依然存在於這個網站中,大家的感覺就變得不一樣了。但無論如何,「你已經擁有自己的專欄」這句說話,若果出自於三傻任何一位口中,對我來說是有傷害性的,是不可接受的。如果有朋友以為我寫專欄,是為了滿足自己,或者為了什麼優越感之類,他亦不再是我的朋友了。因為,基於這個專欄的歷史,我在這裡寫每一篇文章,都帶著一個感情的負擔,這是很疲累的,而作為我的朋友,若不能體諒的話,又算是什麼朋友?
   
緣結.天璣》最後那個問題,答案只有兩個字,就是「感情」

4/F 喜歡閲讀的答案,其實已經很接近了,只是我付出的感情,不單是對朋友的。從對親人、朋友、網站、網友的感情,引申至對香港,對國家,甚至對世人,以及世上所有有形以及無形之物的感情。我寫每一篇文章,都付出了很多感情,所以不能夠單從理性角度去看。也就是說,要明白我寫的文章,總要付出一些感情吧

網主、湯博士、三傻、各位朋友、各位網友,由《序》至今,已經有兩年半多,我諗我已經俾咗大家足夠嘅時間。

17/F Hk 話,寫一篇長文實在很辛苦,不過最辛苦的,是帶著感情去寫文章,這個沒有辦法,我就是這樣的一個人。我在專欄出文,並不是如某些勢利的人所認為,會有什麼有形或無形的著數。希望各位理解,我是不可能在這個專欄再寫文章了,雖然我是不介意辛苦的,但我也沒必要去讓自己,再受到傷害吧?不過嚴格來說,我不算是封筆,只不過在這個網站,我可以立足之地,就只剩下這個回應箱了,我會在這裡回應大家的。

結緣、緣結,彷彿早有定數。《緣結.天璣》彷彿就是一個預言,而這個預言,只消半日就應驗了,可謂準過磚家預測樓市。其實這也不難理解,因果,本身就是一系列錯綜複雜,相互交錯的關係。知道那件事情及發生之後才看到這篇文章的人,可能還以為它是之後才寫,或是修改過吧?我出文之後,除非有重大原因,否則是不會再修改或添加內容的,有的話都只限於錯字、文法,或一些連結、效果之類。

最後我想說的是,你們這 26 個回應,沒有一個不令我感動的,我衷心多謝各位。

至於我話,希望註冊回應者回答那個問題,其實,我是最想某幾位朋友會回答,就算不回答,也留幾隻字吧?

緣結.天璣》是一篇傷感的文章,背後所引發的事情,也是很悲哀的。因為多年以來,我最希望,明白我文章的人,會是我的朋友。

但原來,朋友,還不如陌路人。

28. Oscar Lam 2018-02-11 11:24:16
珍惜香港兄,

分幾次看终於看完你的長文。我自己有時也會寫一、二篇文章。只要自已喜歡,有題材,想寫便寫,主要想通過一些討論為自己取得一些靈感。當然,通過分享一些自已的投資經验和想法,如果能夠帮到一些人就更加好,但关健是自已不要有压力。
29. Oscar Lam 2018-02-11 11:37:03
8/f 引刀兄,

大湾區确實是未來20年内的重大投資機遇,本人也在積極進行中。各位就算暫時不投資,也應該盡快對大湾区内的各地規划,發展和法律、法規作出了解。
30. Jon 2018-02-11 11:37:20
我係被買了樓的人嚇到唔敢買樓留言又被刪post, 係咪睇好一概不能留言!已經唔係第一次,我又冇人身攻擊!点解票delete ,以前都唔係咁!怪不得有料之人全部走囇⋯⋯
31. Jon 2018-02-11 13:03:48
珍兄對唔住,借咗你地盤發一下牢騷。希望你唔好介意。
32. 蓄芳待來年 2018-02-11 17:26:26

珍港兄:


珍港兄覺得自己嘅感情被糟蹋了,湯博士也覺得自己俾人踢下神壇而委屈了,小弟只想說一句:人不知而不愠,不亦君子乎?


以寫作誠意論,論壇內無人及得上珍港兄,唯有d嘢有時不能寫得太白,中咗冧巴降嘅眾生自然睇唔明同冇耐性。


期待珍港兄下篇大作,亦借此祝願大家 新年快樂!

33. 歷史長河 2018-02-11 21:51:21
珍兄,

翻看一下自己的留言記錄,小弟上一次留言是去年5月份,八、九個月的時間就這樣遛走了!回想過去一年時光,一如打工仔兄所言,由每日睇變成得閒先睇。這期間的轉變,有些和你相似,有些又不盡相同。

珍兄作品向來厚重、嚴謹、用心、真誠。對大勢睇得通透,對變化又觀察入微。小弟一直喜歡閱讀,如又能在其中印證自己的一些想法和觀點,常常會欣然傻樂。畢竟投資是件孤獨的事情,路,有人同行才更開心。

「己所不欲 勿施於人」。雖然覺得非常遺憾,但我又豈敢要你繼續?如果决定不再出文,或許可以可常常到這個回應箱坐一坐吧!

珍惜香港,也要珍惜自己。

無言感激。
34. 三奶奶 2018-02-11 22:38:30
傷感的一天😢😢😢
35. 肥婆四 2018-02-12 00:45:23
珍港兄:我知您負出了感情。可惜最近太忙,分咗兩次先睇完此長文,希望您真誠的心始終不變,時間洗擦,文思泉湧之下再發大文,讀者幸甚,家國幸甚也,珍重。
36. Hk 2018-02-12 02:01:26
我也是由每日睇文,後來得閒睇,到後來只會間中睇回應,論壇的風風雨雨就不必多講了。
正如珍港兄説的,我不在香港已經幾拾年,在地球的另一處,也是靠各位的留言,我才能了解現今香港的狀況。
畢竟,各位沒有寫文背後的利益考量。
休息也好!
借珍兄的版面,我再一次的多謝各位的留言。
(因為我以後也不常看這網站了)
37. 孟波 2018-02-12 09:48:34
幾個網棍長駐找空子對非同道謾罵,譏諷過日晨,得佢講唔畀人講,氣氛惡劣,或者爆屎渠都拉到去賣告白揾老襯陪,有識之士走下一個又一個好正常。
38. 習慣 2018-02-12 13:14:22

每日一看已成習慣,就當我支持珍惜香港,每次多看一篇舊文,以感謝珍惜香港用心發文。

既然珍惜香港只會保留呢篇文章嘅回應箱,故我將看舊文後的回應也就全放在這裡好了。

是珍惜香港給論壇作提議,我也順便建議網主在文章完結下藍色框框及我要回應欄附近都加上[論壇首頁]的連結,相信會更方便的。

39. 二少 2018-02-12 17:28:36
珍兄,三儍受咗樓臣咁厚禮待,又點會再在此留言呢?希望珍兄諒解,相信曾幾何時,他們都當佢係朋友,可惜某人的器量,大家有目共睹.連懶人兄都容不下,難為珍惜仲記掛住感“因”
40. AH-HO 2018-02-12 17:48:57
謝謝珍兄過去的文章及用心的分享,有緣一定再見的。
41. 喜歡閲讀 2018-02-13 00:59:16

用心寫嘅文章,一字一句間必會流露出情感。


緣來、緣去,控制不了,唯有學習面對、放下。


緣可能再來,或一去不返,將來回望今天,自有一番滋味,或者⋯⋯得啖笑。


「旁觀者」通常都係陌路人,自然「清」啦!


我都係唔好冇料扮四條喇,做番自己個角色,只讀不回⋯⋯好聽D叫“喜歡閲讀”。

42. 珍惜香港 2018-02-14 21:12:49
珍惜香港

TO:39/F 二少

多謝閣下關心;三傻作為專欄之因,告別篇內提到他們,其實是很自然的事。至於他們留言與否,並不是最重要的,而我亦不是介意這些。但若果是什麼「你已經擁有自己的專欄」等風涼說話,又或者是什麼「抽水」之類的,那就可以免了。

TO:41/F 喜歡閲讀

謝謝關心,當晚我已經放下了。但基於某些原因,我不能向相關的朋友或前朋友,直接作出交代,這是不幸的。我話過,待人處世,一定要有頭有尾,這是我堅持的原則。所以我惟有通過 27/F 的回應,對他們作最後交代,至於他們能否看到,就只有隨緣了。

海航嘅啟示

其實我今日走入嚟,只喺想寫幾隻字,喺關於海航賣走兩幅啟德地呢單嘢。

記得我曾經話過,唔好笑人地接火棒,更加唔好「預期」人地會蝕錢沽番出嚟俾你,佢地喺睇得到連香港人自己都睇唔到嘅值。坊間好多人,都恥笑緊海航,話佢冇咁大個頭,就戴咁大頂帽,但我就反而好欣賞呢間內企。近年內地嚴控走資,就算喺好大嘅內企,要走出去買嘢,都已經唔喺咁容易。由四出融資,跟著洽談合作發展,到最後無奈平手沽走兩幅,當中我見到嘅,喺人地為咗增持寶貴資源,付出咗幾多努力。

唔通好似果啲,一見勢色唔對,就喳喳林劈價離場,不惜對冧個市嘅,先至叫做醒目?

有啲人,買樓落咗訂之後,見樓價好似有啲風吹草動咁,就走去撻訂,結果個賣家袋袋平安之後,當然就喺加價。又有啲人,住得好地地,見個樓價開始跌,就手痕痕沽咗個自住,租住樓先,諗住等個樓價跌多三五七成之後,先至再入返,結果搞到上唔返車。

好多香港人,對自己本土資源嘅珍惜,對自己個「」嘅信心,反而不及內地人,真喺幾可悲。

身為香港人,如果你認為,呢間喺垃圾公司,咁你自己,又喺乜嘢?

啊!今日喺情人節 .....

祝各位,情人節快樂!

43. 海航 2018-02-14 22:58:59

   海航集團稱財務狀況非常健康 總資產為1.5萬億元

  據報道,根據電子郵件聲明,海航稱部分董事和高管已購買了海航集團擔保的離岸美元債券;聲明未披露金額。

  聲明同時表示,海航財務狀況目前「非常健康」,截至2017年底,海航總資產為1.5萬億元人民幣。



1.5 萬億人民幣可以買下18萬間價值一千萬港幣的房子,真是多得一班無殼港燦擔心!

44. 引刀一快 2018-02-15 02:14:28
海航可以平手走,必然係背後有政治因素,萬達賣嘢俾人劈到豬頭咁。
45. 孟波 2018-02-15 08:36:46
我諗起周星早【功夫】一片對白……

沙煲咁大個拳頭,我自己見到都驚呀!潛台詞係我非常打得,但事實?
46. 十郎 2018-02-15 13:33:15


      都係果句 : 人講你就信 , 輸銀X你 !

      有1.5萬億人民幣 ? 好明顯現在200億都擺唔到上檯 , 借都冇得借。佢可以話明益4叔添。

      我都係聽番來 , 習大大十九後 , 眼光望向海外 , 大刀砍向商人 , 要流出去的錢通通都挖回來。包括慢達 ; 覆升 ; 凱航 , 呢d突然間壯大的公司 , 神秘金錢何來 ? 鄧笑平女婿即抓。真假就唔知啦 , 有興趣去youtube "習近平追江派海外資產 , 不讓貪官掏空中國。

47. 十郎 2018-02-15 14:18:56
兩岸國際
大減稅債台高築 拚基建說易行難
 
千呼萬喚始出來。美國總統特朗普終於公布他的基建計劃大綱,估計未來十年至少批准一萬五千億美元的基建投資計劃,並將審批時間縮短至兩年甚至更短。
「拚基建」可說是美國政壇的共識。萬億美元基建大計固然是特朗普競選的其中一個主軸,其對手希拉妮亦有類似政綱。特朗普曾形容,美國的交通就像第三世界一樣,並點名批評洛杉磯國際機場和紐約三個機場。美國基建之落後,用他的話形容,就是「建一座橋就覺得是這個國家的奇迹了」。
正所謂三軍未動,糧草先行,一萬五千億美元並非小數目,錢從何來?尤其是國會最近才通過大規模減稅法案,進一步增加國家長期債務負擔,在此情況下,依靠「中央」撥款肯定窒礙難行。特朗普的如意算盤是,聯邦政府撥出二千億美元,其餘一萬三千億美元由各州政府和私營部門籌措。
資金緊絀 審批漫長
要求地方為大型基建設施買單,當然是一個方向,但從現實角度出發,既然總統將拚基建定調為國家復興的戰略高度,當然應該「中央出雞地方出豉油」。事實上,現時一般主要交通項目的工程款一半資金來自聯邦政府,部分高速公路等項目,聯邦撥款更高達八成。此前有人提出引進中國的技術和資金,而從中國的角度出發,將手上的美債轉化為「硬資產」,本來不失為一個方法。問題是,特朗普一直高呼僱美國人、用美國貨,大型基建項目性質敏感,而中國又是美國最大競爭對手,令引用中資變得更加「政治不正確」。二○一六年美國西部快線公司叫停與中國鐵路公司合作的拉斯維加斯─洛杉磯高鐵項目,原因恰恰是「美國政府規定高速列車必須在美國生產製造」。
美國基建大落後,資金短缺只是其中一個原因,審批程序曠日持久是另一「死穴」,特朗普今次可謂把對了脈。早在上世紀八十年代,加州便計劃興建高鐵,惟其後在徵地、環境評估等問題纏擾不休,最終正式立案已是二○○五年的事。類似的「議而不決,決而不行」,香港人最是熟悉不過。
      抄自15/2/2018 的東方日報。

      身在香港的我 , 好難想像美國這個科技發達國家 , 基建破爛到的程度 , 還差過第三世界 , 無論公路 ; 橋樑 ; 鐵路都嚇得X人。

48. 儍牛 2018-02-16 19:39:50
幾隻訓馬路人走出來抽下水,初二煙花就要取消,煙花唔擺得,過幾日仲要消毀,妹仔真係順應民意。

成千萬嘅煙花🤦‍♂️
維港海景套房🤦‍♀️
煙花海景晚餐🤦‍♂️
維港煙花船河🤦‍♀️
一眾來港遊客🤦‍♂️
有D遊客更加係一世人只來一次香港🤦‍♀️

唔使林奮強出馬計數,就連儍牛都計到香港捐失係億億聲!珍兄有遠見,妹仔易呃,冇宏觀視野,佢揸旗,大家自己食自己。

各位新年快樂🎊

49. 引刀一快 2018-02-17 03:02:36
原來傻牛嘅嗅覺都未報廢喎。


50. 傻牛 2018-02-17 09:46:13
特別同引刀兄拜個年,祝新年進步,大灣區賣多幾過單位,賺多D。然後可以返香港,買返間屋仔,唔使周圍頻撲。
52. 惜緣 2018-03-12 22:49:01

汪敦敬先生好文分享

每週樓市評論
美國泡沫若爆破 港樓面臨「升災」2018-03-08

很多朋友對明年樓價的升幅都有所保留,但我仍認為明年、甚至未來幾年香港的樓價,我們也應預算會繼續大步前進!

09年之後的環球量化貨幣令資產價格上升,但是香港人仍然對樓價上升以情緒化的態度及邏輯去面對,花了好幾年時間去埋怨炒家,直至到了近年,大部份人才知道市場上已經沒有短炒炒家了,但人們仍然是花時間去唏噓樓價升得太快的情意結上!我認為,因量化貨幣而令資產價格上升實際是有三個階段,(1)資產價格上升!(2)財富效應!(3)國際財富轉移!。

2018年我認為正是資產價格上升進入第二個階段「財富效應」了,有資產者的購買力雖然要面對「樓市辣招」等宏調抑壓,但這只能起短期作用,當一段時間後,原本手上的資產因繼續水漲船高自然得到可觀的回報,於是第二個循環的購買力衍生,新一輪循環購買力的衍生不是因為按揭泡沫而來,反而是源於沒有按揭而累積及衍生的硬實力,我們看到迎年樓市本來只聚焦成交在上車細單位,現在不同板塊都在移動了,連車位價格也屢創新高,而且投資氣氛亦熾熱,原因很簡單,就是大家得到新衍生的財富後,只會追求更多的資產,當然息口持續低迷繼續是一個相當大的誘因啊!但最令人擔心就是第三個階段即國際的財富正開始由資金流動去轉移!

甚麼是「國際的財富由資金流動去轉移」?
普遍香港人也忽略一個重要的問題,就是環球量化貨幣最後的結果是甚麼?其實是貨幣的貶值,為何我們過去幾年量化了很多資金,但卻看不到太多貨幣的貶值?因為各國其實是一起量化,但是這種一起量化其實只是初期的平衡,去到一個階段這種平衡總會結束,一些大而弱的國家很大機會突然出現貶值,跟著貶值的主流貨幣便引起了資金由一處流去另一處,而香港正正是要面對這場資金泛濫的頭號城市,變化其實已經開始了,當人們高唱美股牛市即將結束的時候,其實可能才是這個海量資金湧入亞洲市場的開始,回看2017年,全港樓價號稱上升了14.8%,可是美元其實已經貶值了13.7%(截至2018年2月5日),大家想一想,其實我們樓價實質沒有上升太多。

很多人仍用錯了態度去面對美國的衰落!甚至乎會覺得美國泡沫爆破,香港都沒有好日子過!我們一樣會損失慘重,但實際上我們面對的不是跌災,美國泡沫爆破,試問錢會去那裡?為何我近年認為美國經濟爆破風險較大?因為那處的泡沫最大,美匯、美股、美債也已經結構性極不穩定,現在支持著美國的不是經濟結構,是群眾的迷信!

當美國泡沫爆破的時候,只會帶來香港「龍市二期」(低泡沫下的鞏固調整期),香港只會調兩星期至兩個月然後繼續上升,很短時期就分野了。

09年後,樓市投資者的勝敗其實是在乎你是「沽美元還是買中國」,迷信美國的人不單只會相信加息、縮表、信稅務改革會扭轉局面!那怎會落注買香港地產呢?怎樣會不落注買極可能會爆的資產呢?

當「國際的財富由資金流動去轉移」全面開始後,市場最後是需要一些泡沫低,以實業為主的市場投資產品,我認為一帶一路的基建股份將會成為未來投資者熱烈追棒的對象,香港雖然已經有很多優勢被其他城市所取代,卻仍是開放式的金融中心,我認為香港將成為歷史上凝聚資金最多的城市,我認為香港人應該忘記美國過去的主宰性,認真掌握中國領導世界的機遇,以上我的評估,無論最後能實現的是香港的股票市場被中資所接收也好!或者美國的財富真的轉移到中國香港也好,最後也一定會衍生大量的資金流動到港,令香港承受資產大幅而且長期的上升。

在面對大局上,顯示中央政府已經做好了準備,內地的南沙一早已經安排好可以為香港人服務及居住了,而另外一方面,廣東省商務廳宣布今年將繼續提升大灣區市場一體化水平,研究推動自貿區內對港澳在金融、教育、文化和醫療等服務領域,進一步開放,構建「投資大灣區」粵港澳聯合招商機制等,趨勢已經是清楚不過了!我們必須要面對事實啊!

香港是一個甚麼性質的地方?香港,從來都是「來自內地的新香港人主宰的地方」,由我們上一代已經如是,香港人從來包含過客的本質,這個不是負評,香港人是長期往全世界各地流動的一個族群,我們應該發揮這流動性,在未來中國的粵港澳大灣區盡情流通,而香港最強項本來就是市民的意識形態,香港人的醒目、轉數快、效率高、專業、重視法治,是代表了中國卓越一群,在政治上就會最得到最重視及保護,可是近年香港人似乎不重視實際的意識形態,而重視與政府鬥爭的姿態!令真正的軟實力也失去。
基於「最具競爭力的市民住在大都會」,香港人的競爭力下降注定了未來香港會持續被「來自內地來的新香港人」主宰,更多的舊香港人會搬遷到內地居住。

而香港在面對大局上幾乎完全未準備好,香港人普遍是反對增加供應的,市民很容易就會被人挑撥去反對政府製造土地供應,這樣對既得利益者是最有利!而香港的地產有三個死結是香港政府及政客完全沒有去處理的,第一就是租金亦步亦趨於買賣樓價的上升,第二是樓市辣招鎖死了二手供應,令到市場上最大的供應渠道萎縮!第三就是公屋低轉流率竟然跌到去1%左右,1%的轉流率要100年先做到一個轉流循環,試問我們的房屋系統又怎會做得好?公屋低轉流長期麻醉了市場需要,當公屋不夠住的時候亦會排擠富戶,於是儲了多年的市場剛需亦會大量湧出。

市民不支持做正確的事,高官也沒有足夠的決心支持特首的政策下,香港的樓市要得到平衡已經無藥可救,我們香港人要面對的就是盡早融合中國,更要面對樓價是有持續上升的機會!做好升災的準備!香港人的思想太迷信美國,如果要在未來的世界新節奏生存,忘記美國吧!

53. 請教珍哥 2018-04-24 23:16:42
珍哥,最近MA狂沽美金,資金大量流走,隔離磚家話十日沽清銀行結餘,你真係禁腦定?加息無問題?你又話老美保吾住領導地位,宜家人地發難渣,中興㸃收科?弼哥叫人綁好安全帶,貿易戰會吾會係黑天鵝?我想知道你點睇,宜家買樓會吾會連個「家」都保吾住?洗吾洗沽樓?應該怎樣投資?怎樣避險?